Shpallen projektet fituese nga Fakulteti Ekonomik, pjesëmarrës në “Innovate your way out 2017”

Janë zgjedhur fituesit e “Inkubatori i Inovacionit – innovate your way out 2017”, nismë e Fakultetit Ekonomik të Univeristetit të Tiranës, që organizohet për të katërtin vit nga ky fakultet. Studentët e vitit të tretë Bachelor, të organizuar në grupe prezantuan projektet e tyre novatore.

10 projektet e përzgjedhura në fakultet për vitin akademik 2016 – 2017 u prezantuan në një aktivitet që u organizua për këtë qëllim në Hotel Tirana International.

Një panel specialistësh me përfaqësues nga akademia, biznesi, administrata, shqiptarë dhe të huaj zgjodhën projektet fituese. Projektet janë tërësisht të konceptuar, projektuar dhe zhvilluar nga studentët, të organizuar në grupe.

Një projekt për prodhimin dhe tregtimin e çajit bio të malit apo një prizë me zgjatues, idetë novatore tërhoqën vëmendjen e profesionistëve të cilët dhanë vlerësimin e tyre.

Në panel ishte dekani i Fakultetit të Ekonomisë Dhori Kule, por edhe të ftuar të jashtëm, si Kryetari i Bashkisë Erion Veliaj, sipërmarrësja Alketa Vejsiu, ish-studente e këtij fakulteti që vinte aty si themeluese e një kompanie eventesh, Class AV, e cila e ka inovacionin shumë të rëndësishëm në veprimtarinë e saj të përditshme, apo dhe investitorë të huaj.

Erion Veliaj, Kryetari i Bashkisë Tiranë hapi dyert e bashkëpunimit për dy projekte lidhur me transportin publik dhe me parkimin.

Për fituesit u dhanë tri çmime të para dhe një çmim i katërt special.

Çmimi i parë 1,000 € u vu në dispozicion nga Barakat Palace Group, çmimi i dytë, 700 € nga Banka Societe General Albania dhe çmimi i tretë, tablet për çdo pjesëmarrës të grupit, nga NEPTUN Shops. Çmimi special ishte një paketë pushimesh nga Globus Travel për grupin e përzgjedhur.

E veçanta nga vitet e tjera, ishin dimensionet e reja që fitoi aktiviteti, për ta sjellë në një nivel jo vetëm akademik, por më pranë me institucionet dhe biznesin.

Burimi: revistaclass.al