Shoqata Mikrofinanca Shqiptare në Komisionin e Ekonomisë kërkon më shumë hapësira për financim

 Shoqata Mikrofinanca Shqiptare raportoi në një seancë dëgjimore me Komisionin e Ekonomisë dhe Financave në Kuvendin e Shqipërisë, e cila u zhvillua me kërkesë të Shoqatës. Qëllimi i raportimit në Komision ishte informimi për veprimtarinë mikrofinanciare në Shqipëri, arritjet dhe sfidat e saj, impaktin e saj social dhe ekonomik në vend, si edhe pritshmëritë për forcimin e partneritetit midis sektorit dhe organeve qeverisëse të vendit.

Raportimi në lidhje me veprimtarinë e sektorit dhe institucioneve në përbërje të Shoqatës Mikrofinanca Shqiptare u ndal në mënyrë të detajuar në pikat e mëposhtme: prezantim i veprimtarisë financiare të institucioneve financiare jo-banka, me fokus tek kredia dhe mikrokredia; ecuria e veprimtarisë, zhvillimi i mikrofinancës ndër vite, tendencat kryesore; natyra e produkteve dhe shërbimeve financiare, normat e interesit nominale dhe efektive dhe kompozimi i tyre, veprimtaria e mbledhjes së kredive në vonesë; cështje të transparencës dhe etikës në ofrimin e produkteve dhe shërbimeve financiare jo-bankare, cështje te edukimit financiar; sfidat e sektorit për të ofruar shërbime të digjitalizuara në tërësine e tyre; problematikat e sektorit dhe masat që janë marrë dhe po merren për zgjidhjen e tyre.

Një pjesë e mirë e diskutimeve u fokusuan në procesin e automatizuar të vlerësimit të aplikimeve për kredi të vogla të shpejta, për normat e interesit efektive të ofruara nga institucionet anëtare, për nivelin e kredive në vonesë dhe numrin e huamarrësve të cilët nuk ripaguajnë detyrimet ne kohë dhe trajtimin e tyre më pas nga shoqëritë e blerjes së borxhit dhe organet përmbarimore, si edhe në nivelin e rrezikut të kredisë të marrë përsipër nga institucionet financiare jo-banka dhe mënyrën e zbutjes së tij.

Përfaqësuesit e Shoqatës dhanë shpjegime të hollësishme dhe argumenta të plota në lidhje me shqetësimet e deputetëve, të cilat hodhën dritë mbi kompozimin e kostove të këtyre institucioneve, të cilat përkthehen në kostot e kredive të ofruara, si edhe propozuan mënyra dhe mundësi për të ulur kostot e kredidhënies, nëpërmjet rritjes së partneritetit me organet ligjvënëse dhe ligjzbatuese, si edhe organet ekzekutive të qeverisjes.

Lexo: RËNDËSIA E INVENTARIT TË PRODUKTIT – “Suksesi në shitje” nga Denis Gafuri

Ndër kërkesat kryesore të Shoqatës Mikrofinanca Shqiptare përmendim si më poshtë:

• Sektorit t’i jepet akses në fonde më të lira, përfshi financimet nga institucionet financiare lokale apo edhe mundësia për të mbledhur mini-depozita nga tregu;
• Institucionet e mikrofinancës të përfshihen si pjesë me të drejta të barabarta në skemat e mbështetjes për biznesin dhe fermerët, të hartuara apo në proces hartimi nga Qeveria Shqiptare;
• Sistemit financiar në tërësi t’i ofrohet akses i rregulluar me ligj mbi të dhënat financiare të qytetarëve dhe bizneseve në platformën e-albania (me kërkesë dhe autorizim të plotë të klientit), për të automatizuar edhe më tej procesin e vlerësimit të aplikimeve të kredisë, kapacitetit pagues të klientëve dhe për t’i dhënë një shtysë digjitalizimit të plotë të ofrimit të shërbimeve financiare;
• Qeveria të punojë për përmirësimin e sistemit dhe referimit të librit të adresave për të mundësuar një komunikim efektiv dhe në kohë të institucioneve mikrofinanciare me klientët e sektorit;
• Qeveria të mbështesë biznesin familjar dhe mikro-ndërmarrjet me politika të qënësishme, subvencione dhe ndërmjetësim në zinxhirin e vlerës, me qëllim uljen e rrezikut të goditjes së këtyre sektorëve nga kriza e cmimeve dhe pasojat e situatës konfliktuale në Ukrainë.

Seanca pasqyroi rëndësinë e sektorit të mikrofinancës për organet ligjvënëse, në të mirë të zhvillimit ekonomiko-social të vendit, mirëqënies së qytetarëve dhe mundësisë së rritjes së përfshirjes financiare të tyre. Të gjitha institucionet tona anëtare mbeten të angazhuara të vijojnë kreditimin për segmentet e tregut me cilësi të lartë shërbimi, transparencë dhe etikë në ofrimin e produkteve financiare, dhe këshillim dhe lehtësim për klientët në vështirësi.