Një studim i ri ka zbuluar se përfitimet e agjërimit për 16 orë bëhen të dukshme brenda vetëm tre ditësh, pa qenë e nevojshme të reduktohen kaloritë. Kufizimi i kohës së ngrënies në vetëm 8 orë në ditë përmirëson ndjeshëm kontrollin e sheqerit në gjak tek të rriturit që janë në rrezik për diabetin e tipit 2, pavarësisht nëse ngrënia bëhet herët apo vonë gjatë ditës, sipas një studimi të paraqitur në Takimin Vjetor të Shoqatës Evropiane për Studimin e Diabetit (EASD) në Madrid.
Sipas Dr. Kelly Bowden Davies nga Universiteti Metropolitan i Manchesterit, Britani, “Kufizimi i ngrënies në një periudhë prej 8 orësh në ditë përmirësoi dukshëm kohën kur niveli i sheqerit në gjak ishte normal dhe uli luhatjet e tij. Ndryshimi i orarit të ngrënies, qoftë herët apo vonë, nuk dha përfitime shtesë.”
Dr. Davies theksoi se përfitimet kryesore vijnë nga periudha 16-orëshe e agjërimit, dhe jo nga koha kur hahet ose ndryshimet në marrjen e energjisë. Ajo theksoi se përfitimet e këtij agjërimi shfaqen brenda vetëm tre ditësh.
Lexo edhe: Horoskopi javor i karrierës për 16-22 shtator 2024
Studime të tjera kanë treguar se kufizimi i kohës së ngrënies, që kufizon orarin kur hahet dhe jo çfarë hahet, ndihmon në përmirësimin e reagimit të trupit ndaj insulinës dhe ul nivelin e sheqerit në gjak në periudha afatgjata tek njerëzit që janë në rrezik për diabetin e tipit 2.
Për të kuptuar më mirë ndikimin e agjërimit të kontrolluar, studiuesit krahasuan dy periudha të ngrënies: një periudhë herët gjatë ditës (nga ora 8:00 deri në 16:00) dhe një periudhë të vonë (nga ora 12:00 deri në 20:00) tek të rriturit me mbipeshë dhe që bënin pak aktivitet fizik.
Rezultatet treguan se kufizimi i ngrënies në vetëm 8 orë në ditë përmirësoi kohën kur nivelet e sheqerit në gjak ishin normale dhe uli luhatjet e tij. Nuk pati ndryshime të rëndësishme midis ngrënies herët ose vonë në ditë, çka sugjeron se vetëm agjërimi për një periudhë të caktuar është i mjaftueshëm për të sjellë përfitime shëndetësore.
Ky studim sugjeron se, për ata që janë në rrezik për diabetin e tipit 2, një mënyrë e thjeshtë për të përmirësuar kontrollin e sheqerit në gjak është kufizimi i orarit të ngrënies, pa qenë nevoja të numërohen kaloritë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
