Shkencëtarët e Universitetit të Stanfordit kanë zhvilluar një metodë të re që përdor një ngjyrues të zakonshëm ushqimor për të bërë lëkurën dhe muskujt e kafshëve të tejdukshme në mënyrë të përkohshme dhe të sigurt. Kjo teknikë inovative, e cila e bën të dukshme strukturën e brendshme të organeve pa ndikuar në shëndetin e organizmit, mund të ndryshojë mënyrën se si diagnostikohen dhe trajtohen sëmundjet. Përdorimi i një ngjyruesi të tillë për t’i bërë indet të tejdukshme hap mundësi të reja në fushën e mjekësisë dhe kërkimeve shkencore.
Metoda, e zbuluar nga një ekip në Stanford dhe e publikuar në revistën Science më 6 Shtator 2024, ka potencial të madh për të revolucionarizuar disa fusha mjekësore, nga diagnostikimi i çrregullimeve tretëse deri te identifikimi i kancerit.
Profesor Guosong Hong, një nga studiuesit kryesorë, thekson se kjo metodë mund të ketë përdorime të ndryshme praktike. “Teknologjia mund të bëjë venat më të dukshme për marrjen e gjakut, të ndihmojë në heqjen e tatuazheve me lazer, dhe madje të përmirësojë trajtimet e hershme të kancerit,” tha ai.
Një nga ngjyruesit ushqimor që studiuesit përdorën me sukses ishte tartrazina, ose më saktë ngjyruesi i njohur si FD & C Yellow 5. Kur ky ngjyrues përthithet nga indet, ai arrin të përshtatet me inde të ndryshme brenda trupit, duke përmirësuar mënyrën se si drita përshkon trupin dhe e bën atë të dukshëm. Kjo ndodh sepse tartrazina arrin të përputhë inde të ndryshme, duke i bërë ato të tejdukshme dhe lehtësisht të depërtueshme nga drita. Në eksperimente laboratorike, pjesë të holla të mishit të pulës u bënë transparente pasi përthithën këtë ngjyrues.
Më pas, studiuesit përdorën këtë zgjidhje tek minjtë, ku aplikuan ngjyruesin mbi lëkurën e kokës për të parë enët e gjakut që përshkojnë trurin. Ngjashëm, ngjyruesi u aplikua mbi bark, duke e bërë të dukshme lëvizjen e zorrëve dhe organeve të tjera. Ky proces zbuloi detaje të mikroskopike, që më parë ishin të fshehura nën lëkurë.
Një nga aspektet më interesante të këtij zbulimi është se procesi është plotësisht i kthyeshëm. Pasi ngjyruesi shpëlahet, lëkura dhe indet kthehen në gjendjen e tyre origjinale, pa efekte afatgjata apo dëmtime. Ngjyruesi tartrazinë sekretohet plotësisht brenda 48 orëve përmes trupit. Ky zbulim hap rrugën për përdorimin e kësaj teknike në diagnostikimin mjekësor, duke ofruar pamje të qarta të organeve dhe strukturave të brendshme pa pasur nevojë për procedura invazive.
Një përdorim tjetër i mundshëm i kësaj teknologjie është përmirësimi i trajtimeve me lazer për kancer. Aktualisht, trajtimet me lazer kufizohen në zona afër sipërfaqes së lëkurës për shkak të pamundësisë së dritës për të depërtuar më thellë në trup. Ky zbulim mund të përmirësojë ndjeshëm këtë proces, duke bërë të mundur depërtimin e dritës edhe në zona më të thella.
Studimi u mbështet nga një grup i gjerë shkencëtarësh dhe teknologësh, të cilët përdorën konceptet optike të njohura që nga vitet 1970 dhe 1980 për të arritur këtë sukses. Kërkimi është frymëzuar nga disa nga ligjet themelore të fizikës optike, që kanë treguar se ndryshimet në inde mund të përdoren për të drejtuar dritën në mënyrë të kontrolluar.
Ky zbulim pritet të ketë ndikim të madh në mjekësi dhe shkencat biologjike. Me zhvillime të mëtejshme, teknologjia e bazuar në ngjyruesit ushqimorë mund të përdoret për një gamë të gjerë zbatimesh, nga diagnostikimi mjekësor te trajtimet për sëmundje të ndryshme, përfshirë edhe kancerin.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
