Rekrutimi i punonjësve të duhur është vetëm hapi i parë në sfidën e madhe. Ajo që ndodh më pas, pra procesi i përshtatjes së tyre me kulturën dhe ekipin është përcaktues për suksesin e tyre dhe të kompanisë.
Nga momenti kur një punonjës i ri hyn në derën e kompanisë, ai nis një rrugëtim të ndërlikuar, duke filluar që me njohjen e kolegëve, kuptimin e pritshmërive, mësimin e procedurave dhe adaptimin e mënyrave të punës.
Lexo gjithashtu: Si braktisi studimet për biznesin që do t’i ndryshonte jetën miliona njerëzve? Historia e pazakontë e Zeb Evans
Ky proces mund të zgjasë disa muaj dhe, nëse nuk menaxhohet siç duhet, mund të ndikojë negativisht në performancën dhe përkushtimin e punonjësve të rinj.
Në fakt, 20% e dorëheqjeve ndodhin brenda 45 ditëve të para të punës, një shifër alarmante për kompanitë që nuk investojnë në një strategji të mirëfilltë të përshtatjes së punonjësve të rinj.
Si mund të siguroheni që ky proces të jetë sa më i thjeshtë dhe efektiv? Disa nga kompanitë më të suksesshme në botë kanë gjetur formula të shkëlqyera për ta bërë nisjen e këtij rrugëtimi, një eksperiencë pozitive dhe motivuese. Më poshtë do gjeni disa mënyra që mund t’i përshtasni dhe ju!
Lexo gjithashtu: La karrierën e suksesshme në financë për vajin pikant, fitoi apo humbi Ethan Yong me këtë zgjedhje?
Si e bëjnë këtë kompanitë e mëdha?
- Glitch, një udhërrëfyes që mund t’ju ndihmojë
Platforma e teknologjisë Glitch ka krijuar një metodë inovative për të ndihmuar punonjësit e rinj të ambjentohen lehtësisht. Ata përdorin një mënyrë të personalizuar, ku çdo punonjës i ri ka një listë të qartë detyrash që duhet të përfundojë në ditën e parë, javën e parë dhe më tej.
Përveçse ndihmon në organizim, ky sistem parandalon konfuzionin kur dikush mungon në zyrë dhe siguron që çdo informacion i nevojshëm të jetë i aksesueshëm për të gjithë.
Çfarë mund bëni më Glitch?
-Mund të përgatisni përgjigjet për pyetjet e zakonshme të punonjësve të rinj dhe sigurohuni që ato të jenë lehtësisht të aksesueshme.
-Mund të caktoni role specifike për secilin anëtar të ekipit në procesin e ardhjes.
-Mund të mbani informacionin transparent! Mos lini njohuritë thelbësore vetëm në kokën e disa individëve.
Lexo gjithashtu: Strategjia psikologjike e një CEO-je që ndihmon në arritjen e suksesit – mund të zgjasë më pak se 30 sekonda
- Seismic, informacion i detajuar dhe prezantim i strukturës
Në Seismic, çdo punonjës i ri merr një dokument 18-faqësh me informacione mbi historinë, kulturën dhe vlerat e kompanisë, si dhe udhëzime praktike për menaxhimin e takimeve dhe sigurinë kibernetike.
Një tjetër element interesant është “email-i i prezantimit”, që u kërkon punonjësve të rinj të ndajnë detaje personale dhe një foto miqësore me kolegët, duke i ndihmuar ata të lidhen më shpejt me ekipin.
Si mund ta aplikoni këtë praktikë?
-Siguroni një udhëzues të detajuar mbi kulturën dhe pritshmëritë e kompanisë.
-Krijoni një mënyrë të strukturuar për prezantimin e punonjësve të rinj.
- Zappos, kultura para gjithçkaje
Gjigandi i tregtisë online, Zappos, e ka kthyer ardhjen në punë në një proces të thellë njohjeje dhe integrimi. Të gjithë punonjësit, pa përjashtim, kalojnë katër javë trajnim në shërbimin ndaj klientit, pavarësisht nëse janë inxhinierë apo menaxherë.
Në fund të trajnimit, ata përballen me një zgjedhje të pazakontë, mund të qëndrojnë në kompani ose të pranojnë një ofertë financiare për t’u larguar nëse nuk ndihen të përshtatshëm. Ky sistem siguron që vetëm ata që vërtet përputhen me kulturën e kompanisë të qëndrojnë.
Çfarë mund të bëni me Zappos?
-Përcaktoni qartë që në fillim nëse një punonjës është i përshtatshëm për kompaninë tuaj.
-Përfshini një eksperiencë praktike në fillim të punës për të testuar angazhimin dhe aftësitë e tyre.
Lexo gjithashtu: Këto 4 veprime “të pazakonta” ndihmuan Bezos në krijimin e kompanisë 1 trilion dollarëshe
- Whole Foods, votimi pas 90 ditëve
Pas tre muajsh në punë, çdo punonjës i ri në Whole Foods i nënshtrohet një votimi nga ekipi. Nëse dy të tretat e kolegëve votojnë në favor, ai mbetet pjesë e ekipit, përndryshe, duhet të largohet.
Ky model e kthen fillimin e punës në një proces interaktiv dhe të motivuar nga ekipi, duke ndihmuar punonjësit e rinj të angazhohen që në fillim.
Si mund ta përdorni këtë ide?
-Përfshini kolegët në vlerësimin e punonjësve të rinj.
-Krijoni një sistem që nxit bashkëpunimin dhe përfshirjen në grup.
Si ta bëni fillimin e punë të duhur për këdo?
Përveç praktikave, ka disa hapa të thjeshtë që mund të bëni për ta bërë fillimin e punës të lehtë dhe efektiv.
Filloni ditën e parë në orën 11:00
Kështu, ekipi ka kohë të përgatitet dhe të sigurojë një pritje të organizuar.
Menaxheri të bëjë prezantimin
Asnjë punonjës i ri nuk duhet të lihet të sillet i pasigurt në zyrë. Prezantimi duhet të bëhet nga një figurë e rëndësishme në kompani.
Nuk ka mbingarkesë në ditën e parë
Punonjësit e rinj janë shpesh të emocionuar dhe të lodhur nga procesi i ri, ndaj është e rëndësishme që të mos i ngarkoni me shumë informacion.
Një dhuratë simbolike
Një detaj i vogël, si një libër që përfaqëson filozofinë e kompanisë ose një dhuratë simbolike, ndihmon në krijimin e lidhjes emocionale.
Socializimi i strukturuar
Organizoni dreka me kolegë nga departamente të ndryshme për të ndihmuar punonjësit e rinj të lidhen më shpejt me ekipin.
Kur investoni në një proces të qartë dhe të organizuar, ju jo vetëm që rrisni produktivitetin e punonjësve të rinj, por edhe forconi kulturën e kompanisë dhe reduktoni ndërrimet e shpeshta të stafit.
Në fund të fundit, një punonjës i përgatitur mirë është një punonjës i motivuar dhe një ekip i motivuar është çelësi i suksesit të çdo biznesi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
