Në çdo takim me një themelues startup-i, ka një pyetje që shpesh i lë pa fjalë:
“Sa muaj jetë ka startup-i juaj?”
Lexo gjithashtu: Utopitë e miliarderëve – 8 miliarderë që po krijojnë qytetet e tyre!
Kjo pyetje e thjeshtë, që nënkupton sa kohë mund të mbijetojë kompania me fondet ekzistuese nëse nuk hyn më asnjë e ardhur, është një test i vërtetë lidershipi. Në shumicën e rasteve, përgjigjja është e paqartë, e hamendësuar, ose nuk ekziston fare. Dhe kjo mungesë transparence financiare nuk është vetëm një gabim teknik, është një kërcënim real për mbijetesën e kompanisë.
Pse kjo pyetje kaq e thjeshtë është kaq e fuqishme?
Sepse mungesa e një përgjigjeje të saktë tregon më shumë se çdo bilanc apo raport financiar. Nëse një themelues nuk e di se sa kohë ka para se t’i mbarojnë paratë, atëherë po drejton një anije në errësirë, me shpresën se era do ta çojë diku të sigurt.
Shumica e themeluesve nuk janë të papërgjegjshëm. Përkundrazi, ata janë të zënë duke ndërtuar produkte, rritur ekipe, kërkuar klientë dhe investitorë. Por, në të gjithë këtë vrap drejt suksesit, ata shpesh harrojnë një realitet themelor, paratë nuk janë të pafundme, dhe shpresa nuk është strategji.
Lexo gjithashtu: Samir Mane, shqiptari i parë në listën e miliarderëve të Forbes
Ja çfarë mund të ndodhë kur s’e di jetëgjatësinë:
Skalimi i biznesit pa e ditur se sa gjatë mund të përballosh kostot.
Punësimi i stafit të ri duke menduar gabimisht se “do ia dalim”.
Shtyrja e raundit të investimeve deri sa të jetë shumë vonë.
Marrja e vendimeve drastike në panik, ulje pagash, pushime nga puna, ose shitje të detyruara.
Pse shmangin themeluesit këtë pyetje?
Zakonisht, jo nga mosvullneti, por për arsye emocionale:
Frika nga realiteti – më mirë mos e dish fare sesa të përballesh me një situatë të vështirë.
Mbingarkesa me numra dhe llogari – shumë themelues nuk janë nga fusha e financave dhe e shohin si diçka komplekse.
Optimizmi i tepruar – që është i domosdoshëm për të nisur një biznes, por i rrezikshëm kur nuk bazohet në të dhëna reale.
Çfarë ndodh kur një themelues e njeh mirë jetëgjatësinë?
Lidershipi ndryshon. Vendimet bëhen më të qarta, investimet më të zgjuara, dhe kapitali kërkohet kur kompania është në pozicion të fortë, jo kur është me shpatulla pas murit. Kjo qetësi financiare ndikon në gjithë organizatën dhe e shndërron drejtuesin në një lider të sigurt dhe strategjik.
Ja çfarë mund të bëjë çdo themelues për të ndërtuar qartësi financiare:
Mbani nën kontroll cash flow-in real çdo muaj – jo vetëm fitimet në letër.
Parashikoni konservativisht – supozoni se çdo gjë do zgjasë më shumë dhe do kushtojë më shumë.
Testoni skenarët më të vështirë – çfarë ndodh nëse humbisni një klient të madh? Apo nëse investimi vonohet?
Merrni përgjegjësinë për financat tuaja – edhe nëse keni një CFO, asnjë nuk kujdeset për kompaninë tuaj më shumë se ju vetë.
Mësimi më i madh?
Themeluesit që përballen me të vërtetën, edhe kur është e dhimbshme, ndërtojnë kompani më të forta. Ata që e shmangin, shpesh përballen me vendime të dhimbshme më vonë dhe ndonjëherë, humbin gjithçka që ndërtuan.
Kjo pyetje nuk është thjesht për financën, është një test lidershipi. Dhe ata që e kalojnë, janë ata që mbijetojnë dhe lulëzojnë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English