Fondacioni Down Syndrome Albania (DSA) organizon për të 3-tin vit rradhazi fushatën “Garo/Mbështet si Maratonomak DSA-në”, në kuadër të Maratonës së Tiranës që këtë vit mbahet më 22 Tetor.
Kjo fushatë ndërgjegjësuese dhe për ngritje fondesh u ideua në vitin 2021 nga Daniel Nikolla, një profesionist i marketingut dhe i komunikimit që jeton dhe punon në Angli në bashkëpunim me Emanuela Zaimi, themeluesen e DSA.
Fondacioni Down Syndrome Albania (DSA), është një organizatë jo-fitimprurëse që ofron shërbime terapeutike (si logopedi, terapi ABA, terapi e zhvillimit, terapi fizike, etj.) për fëmijë me aftësi të kufizuara.
Aktualisht në qendrën e Shërbimeve PRO PAK të DSA marrin shërbime të specializuara 42 fëmijë (0-13 vjeç), prej të cilëve 15 janë me sindromën Down, 24 në spektrin e autizmit dhe 3 fëmijë me diagnoza të tjera mjekësore (si p.sh. humbje në dëgjim, fëmijë me implant koklear që kanë të nevojshme terapinë e gjuhës dhe të të folurit).
Këto shërbime nuk gjejnë mbështetje nga shteti dhe shumë prindër e kanë të pamundur të përballojnë vlerën e shërbimit pasi dhe mbështetja ekonomike për aftësinë e kufizuar është minimale, karshi nevojës). Vetëm 5 prej këtyre familjeve kanë mundësi të paguajnë tarifën e plotë të shërbimit prej 2000 leke / per 1 orë terapi, dhe mesatarisht 1 fëmijë i duhen të paktën 15 orë terapeutike në muaj. 37 familjet e tjera kanë nevojë për mbështetje për shërbim pa pagesë apo me tarifa të reduktuara.
Për këto arsye, DSA organizon fushata të ndryshme për ngritje fondesh nga komuniteti i biznesit apo dhurimet e qytetarëve.
Këtë vit, fondacioni ka synim që mbi 250 maratonomakë të garojnë për kauzën, si dhe mbledhjen e 30.000 euro fondesh, përmes dhurimeve të komunitetit të biznesit dhe individëve nga Shqipëria e Diaspora. Deri më tani, fushata ka ngritur rreth 26.000 euro fonde dhe mes 270 vrapuesve të regjistruar deri më tani gjenden qytetarë të thjeshtë, vetë prindërit e fëmijëve me aftësi të kufizuara, njerëz të medias apo botës së artit si dhe atletë profesionistë që rrëmbejnë trofe nëpër maratona. Maratonomakët e kauzës janë jo vetëm nga Shqipëria. Ata vijnë dhe nga Kosova e diaspora, këta të fundit të angazhuar dhe vetë për ngritje fondesh nga miqtë apo klientët e tyre në shtetet ku jetojnë.
Vitin e shkuar ekipi #VrapoPërDSA #RunForDSA rrëmbeu dhe çmimin “Grupi më i Madh” dhe synon ta fitojë sërish këtë çmim më 22 Tetor.
Ju ftojmë të bëheni pjesë e një kauze, që jo vetëm ndihmon drejtpërdrejt familje në nevojë duke i mbështetur në sigurimin e shërbimeve terapeutike për fëmijët e tyre, por edhe frymëzon solidaritet mes qytetarësh.
Për të ndihmuar që fushata të arrijë, dhe pse jo të kalojë targetin e synuar të fondeve, ju mund të dhuroni në faqen e Go Fund Me të Daniel Nikolla, ideatorit të fushatës: https://www.gofundme.com/f/help-raise-30000-euros-for-down-syndrome-albania
Në rast se dëshironi të dhuroni si biznes mund të shkruani në adresën e e-mail: info@dsalbania.org
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Tantra