Përmes një raporti dërguar Qeverisë, kompania akuzon se janë penguar në mënyrë të qëllimshme. Kompania “Crown Agents” ka hedhur poshtë akuzat për paaftësi, duke fajësuar korrupsionin dhe pengesat e administratës doganore në përmbushjen e rolit të saj për rritjen e të ardhurave nga doganat. Përmes një raporti dërguar Kryeministrit dhe Ministrit të Financave, “Crown Agents”, ka denoncuar korrupsionin sistematik të administratës tatimore si dhe pengesën e vullnetshme të saj për të mos lejuar kompaninë të kryente rolin e saj. Televizioni “Vizion Plus” ka bërë publik raportin, ku “Crown Agents” sqaron pengesat për shkak të të cilave nuk ka arritur të përmbushë detyrimet e saj kontraktuale. E pyetur nga “Shqiptarja.com”, zyra e shtypit të Ministrisë së Financave tha se bëhet fjalë për një raport të vitit 2014, përpara se të lidhej kontrata e konsulencës mes kompanisë me qeverinë shqiptare.
Raporti
Qëndresa që kanë dëshmuar disa punonjës të doganës për të kryer kontrollet në mënyrën e duhur dhe në veçanti mungesa e vullnetit për të vendosur penalitetet e duhura për rastet e shkeljeve të regjimeve doganore, thekson një prej pikave të raportit, i cili vazhdon me korrupsionin e punonjësve të doganave dhe mungesën e vullnetit për bashkëpunim. “Niveli dhe kompleksiteti i korrupsionit të organizuar e sistematik në dogana, i krijuar në mënyrë të qëllimtë për të mbështetur mashtrimin me të ardhurat; Mungesë bashkëpunimi nga ana e një numri Degësh Doganore, Kryetarësh të Degëve Doganore si dhe juristësh e të tjerëve nëpërmjet dëshmimit të mungesës së njohurive, paaftësisë e, në disa raste, edhe pengim të qëllimshëm; Mungesë e të dhënave të kompjuterizuara, përfshirë mungesën e një sistemi për regjistrimin e rasteve të zbuluara, veprimeve kriminale dhe informacionit të përpunuar kriminal”, thekson raporti i bërë publik nga “Vizion Plus”.”
“Paaftësia”
Britanikët theksojnë gjithashtu në raport se janë penguar të bëjnë punën e tyre nga drejtoritë e doganave, ku në rastin më të mirë thonë ata, kjo ka qënë një paaftësi. “Gjatë pesë muajve të parë të Programit, “Crown Agents”, ka hasur pengesa të konsiderueshme dhe mosmarrëveshje në të gjitha fushat me stafin e doganave nëpër rrethe, dhe, në të gjitha rastet, vlerësimi nga ana e doganës ishte më i ulët se vlerësimi i kryer nga ekspertët e “Crown Agents”. Situata në lidhje me këtë çështje, tashmë është përmirësuar ndjeshëm, megjithëse, kufizimet dhe pengesat lidhur me shpërndarjen operacionale efektive të skuadrave tona mbetet një çështje shqetësuese. Por kjo gjë ka sjellë një ulje të të ardhurave në vlerën 12.37 milionë euro plus 5.68 milionëve të tjerë si pasojë e mosvjeljes së gjobave. Ne vlerësojmë se vlera totale e identifikuar në lidhje me humbjen e mundshme të të ardhurave nga tetë skuadrat operative është 12.37 milionë EURO gjatë kësaj periudhe”, thotë “Crown Agents”. Kompania konsulente vlerëson gjithashtu se të ardhurat totale shtesë referuar gjobave, si rezultat i punës së skuadrave operative, nëse do të ishin vjeluar në mënyrë korrekte, do kapnin shifrën e 5.68 milionë EURO.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
