Kryeministri Edi Rama ka shpallur këtë të hënë, në një takim të posaçëm nisjen e fazës së dytë të aksionit kundër informalitetit.
Në fjalën e tij, Rama ka shprehur bindjen për suksesin e këtij operacioni, duke parë fazën e parë të tij, që solli sipas tij “rezultate të prekshme”.
Shefi i qeverisë ka nënvizuar se në 20 vjet ekonomia informale kishte shtrirë rrënjët e saj, duke arritur të bashkëjetonte me shtetin dhe duke bërë të pamundur mbrojtjen e konsumatorëve.
“Ndërsa sot jemi në kushte të reja. Hapëm dy kanale të rëndësishme komunikimi për të denoncuar informalitetin”, ka thënë Rama, duke shtuar se “formalizimi është një e mirë e përbashkët”.
Më tej, duke cituar disa të dhëna statistikore Rama ka saktësuar: “Të ardhurat për 3-mujorin e parë të vitit janë përtej parashikimeve, në 3 muaj kemi arkëtuar rreth 100 milionë dollarë më shumë, kemi regjistruar një rritje të ndjeshme në produktet e akcizës, falë rezultateve zeruam taksat për rreth 83 mijë biznese të vogla. Jemi duke mbyllur përfundimisht shtigjet e kontrabandës”, ka shtuar Rama.
Ndërsa ministri i Financave, Arben Ahmetaj ka deklaruar se, sot Shqipëria ka një model të ri ekonomik të konfirmuar nga 3 institucione ndërkombëtare dhe Banka e Shqipërisë.
“Sot ekonomia shqiptare e ka lënë krizën mbrapa dhe në themel ka luftën kundër informalitetit”, ka thënë Ahmetaj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
