Reddit është gjobitur me më shumë se 16 milionë euro nga organi mbikëqyrës i informacionit në Mbretërinë e Bashkuar, duke akuzuar gjigantin e mediave sociale për dështim në mbrojtjen e fëmijëve dhe duke i lënë ata të prekshëm ndaj “përmbajtjes së papërshtatshme dhe të dëmshme”.
Pas një hetimi, Zyra e Komisionerit të Informacionit (ICO) zbuloi se kompania amerikane kishte neglizhuar zbatimin e mjeteve të fuqishme të verifikimit të moshës.
“Fëmijëve nën moshën 13 vjeç u janë mbledhur dhe përdorur të dhënat personale në mënyra që ata nuk mund t’i kuptonin, të pranonin apo t’i kontrollonin,” deklaroi John Edwards, Komisioneri i Informacionit në Mbretërinë e Bashkuar. “Kjo i ka lënë ata potencialisht të ekspozuar ndaj përmbajtjes që nuk duhej ta shihnin. Kjo është e papranueshme dhe ka sjellë si pasojë gjobën e vendosur sot.”
Kjo është gjoba e tretë më e madhe financiare që ka vendosur ndonjëherë Zyra e Komisionerit të Informacionit (ICO). Më herët, ICO ka gjobitur British Airways me 20 milionë paund për një shkelje të sigurisë së të dhënave që preku mbi 400 mijë klientë në vitin 2018, si dhe grupin Marriott me 18.4 milionë paund, pasi mbi 300 milionë të dhëna klientësh u komprometuan nga një sulm kibernetik në vitin 2014. Reddit njoftoi se do të apelojë vendimin. Sipas një përfaqësuesi të kompanisë, kërkesa e ICO që Reddit të mbledhë më shumë të dhëna personale nga çdo përdorues në Mbretërinë e Bashkuar “bie ndesh me bindjen tonë për mbrojtjen e privatësisë dhe sigurisë së përdoruesve”.
Kompania thekson se nuk kërkon informacione identifikuese nga përdoruesit, pavarësisht moshës, sepse e konsideron privatësinë dhe sigurinë e tyre si parësore. Reddit pohon se llogaritë e përdoruesve nën 13 vjeç hiqen, pasi kjo moshë nuk lejohet në platformë. Në kushtet e përdorimit thuhet se “duke përdorur shërbimet, ju deklaroni se jeni të paktën 13 vjeç”.
Nga korriku i vitit të kaluar, Reddit ka filluar të kërkojë nga përdoruesit në Mbretërinë e Bashkuar që duan të shohin përmbajtje për të rritur, si p.sh. materiale pornografike, të vërtetojnë se janë mbi 18 vjeç, duke ngarkuar një selfie ose një foto të dokumentit të identitetit. Kjo masë është marrë për të qenë në përputhje me ligjin e ri britanik për sigurinë online.
Sipas John Edwards, kompanitë që ofrojnë shërbime online ku mund të kenë qasje fëmijët kanë detyrimin t’i mbrojnë ata nga rreziqet. “Kjo do të thotë të jenë të sigurt për moshën e përdoruesve të tyre dhe të kenë masa reale dhe efektive për verifikimin e moshës. Reddit nuk arriti t’i përmbushë këto standarde,” u shpreh ai. Organizatat që mbrojnë të drejtat e fëmijëve online thonë se rregullat që do të mund të shmangnin këtë situatë kanë ekzistuar prej vitesh, por nuk janë zbatuar siç duhet.
Colette Collins-Walsh, drejtoreshë për Mbretërinë e Bashkuar në organizatën 5Rights Foundation, u shpreh se për vite me radhë një platformë e madhe globale u mbështet vetëm te një “klikim” ku përdoruesi deklaronte moshën, duke lënë fëmijët më të vegjël të pambrojtur. Sipas saj, ndërsa qeveria debaton për rritjen e kufijve të moshës online, rregulloret që ekzistojnë që prej vitit 2018 nuk janë zbatuar seriozisht. “Rregullat e reja nuk kanë vlerë, nëse ato që ekzistojnë nuk zbatohen,” theksoi ajo.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
