Portugali, shefi ndalohet me ligj t’ju kontaktojë jashtë orarit të punës

Ju ka rastitur të keni një shef këmbëngulës që nuk pushon së dërguari mesazhe edhe pasi keni përfunduar orarin e punës? Në Portugali, kjo sjellje është tashmë e paligjshme.

Së fundi, vendi prezantoi një ligj që ndalon punëdhënësit të kontaktojnë punëtorët jashtë orarit të tyre të rregullt përmes telefonit, mesazhit apo emailit.

“Punëdhënësi duhet të respektojë privatësinë e punëtorit”, duke përfshirë periudhat e pushimit dhe të kohës familjare, parashikon ligji i ri. Çdo shkelje, vijon më tej, përbën një shkelje “të rëndë” dhe mund të rezultojë me gjobë.

Politika e re e Portugalisë është pjesë e legjislacionit që rregullon punën nga shtëpia. Punonjësit kanë të drejtë të heqin dorë nga puna në distancë nëse dëshirojnë – por ata mund të kërkojnë marrëveshjen nëse është në përputhje me punën e tyre.

Masa parashikon gjithashtu që punëdhënësit janë përgjegjës për t’u siguruar punëtorëve mjetet e duhura për të kryer punën e tyre nga distanca. Ata duhet t’i rimbursojnë punëtorët për çdo shpenzim shtesë, duke përfshirë çdo rritje të faturave të tilla si energjia elektrike dhe gazi, që mund të pësojnë gjatë punës nga shtëpia.

Lexo: 4 zakonet e njerëzve më të lumtur që praktikohen rrallë nga shumica e punonjësve

Kryeqyteti, Lisbona, ka punuar shumë për të tërhequr nomadët digjitalë që duan të përfitojnë nga puna në distancë për t’u zhvendosur përkohësisht ose për të udhëtuar jashtë vendit të tyre.

Praktika u bë më e zakonshme gjatë pandemisë. Firma kërkimore Gartner vlerëson se punëtorët në distancë do të përfaqësojnë 32 për qind të fuqisë punëtore globale deri në fund të 2021, krahasuar me 17 për qind në vitin 2019.

Rreth tre vite më parë, një rregull i ngjashëm u parashikua për punëtorët edhe në Francë. Ata fituan të drejtën të mos iu përgjigjen emaileve të biznesit pas orarit të punës.

CNN