Kanë kaluar më tepër se 12 vjet që kur ka hapur shkollën private për përgatitjen e ëmbëlsirave dhe ushqimeve, në të cilën kanë kaluar rreth 1.500 kursantë. Naser Gashi, nga Prishtina, i cili jeton dhe punon në Slloveni, ka treguar se janë 80 lloje ëmbëlsirash dhe ushqimesh që ai ua mëson atyre që vijnë në “La Ganache”, për të përvetësuar artin kulinar.
Ai ka treguar se për më tepër se 20 vjet ka jetuar në shtetin francez, nga ku e ka nuhatur dashurinë e tij për gatimin e ëmbëlsirave dhe dashurinë për kuzhinën.
“Në vitin 2000, kam shkuar një hap më tutje dhe kam përfunduar “Shkollën e Artit Kulinar Francez”, dhe këtë përvojë e kam përcjellë në Slloveni, ku ka disa vite që jetoj me familjen time.
Gashi ka thënë se në shkollën e tij ka kursantë edhe nga shtetet e tjera, përveç Sllovenisë, duke shtuar se ai mban trajnime edhe në vende të ndryshme të Ballkanit dhe Europës, në varësi të kërkesave që ka.
“Është interesant fakti se shqiptarët që merren me pastiçeri në Slloveni janë nga Tetova dhe Gostivari, të cilët janë të vendosur prej shumë vitesh nëpër qytete të ndryshme të këtij shteti. Është më pak interesant fakti që unë si një prishtinas kam përfunduar në këtë zanat, për arsye se nuk kam ndonjë traditë familjare, përpos dëshirës dhe pasionit tim”, ka theksuar ai.
Prishtinasi 50-vjeçar thotë se përvojat më interesante të tij kanë qenë kur “nxënësi/et” e tij kanë lënë profesionet e tyre dhe kanë hapur pastiçeritë e tyre.
“Dy raste që po më kujtohen, pasi unë gati 90% të kursantëve i kam femra, kanë qenë kur një arkitekte dhe një avokate, pasi kanë qenë në “La Ganache”, janë tërhequr nga profesionet e tyre, për t’u marrë me kulinari”, ka shtuar Gashi.
Ai ka treguar se disa kohë ka qenë asistent profesor, në Fakultetin e Akullores në Bologna të Italisë, që njihet si vendi ku përgatitja e akullores, për të mos e tepruar, është kthyer në një “shkencë”.
“Një porosi që kam për shqiptarët është që në çdo fushë të përgatiten dhe të shkollohen maksimalisht. Të mos mundohen që gjithë jetën të improvizojnë. Përsa i përket kësaj fushe, unë mund të them lirisht që të gjithë ata që përfundojnë një trajnim, kurs ose shkollë, nuk do të mbesin keq për punë”, përfundon Gashi.
https://www.facebook.com/la.ganache.9/videos/502053963262791/
Burimi: telegrafi.com
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English