Furnizuesi i Tregut të Lirë (FTL) nën/kompani e OSHEE Group hapi të Hënën një procedurë të re ankandi për sigurimin e sasisë së energjisë për konsum në vend gjatë 13-17 tetorit për një sasi 30 mijë MWh dhe 14 400 MWh. Ankandi paraardhës ishte ai i 4-10 Tetor kur FTL importoi energji në një vlerë financiare prej 13 milionë eurosh me një çmim rekord prej 233 euro/MWh çmimi më i lartë me të cilin vendi ka siguruar ndonjëherë energji.
Në Bursën Hungareze çmimi i energjisë në pik për këtë të Hënë( 11 Tetor) ishte 219.52 euro MWh me një ulje të lehtë në raport me çmimet e datës 10, kur në pik energjia u shit me 227.18.
Këtë vit OSHEE ka harxhuar rreth 35 mln euro më shumë se vitin e kaluar për të blerë energji elektrike. Kjo gjë e ka përkeqësuar financat e kompanisë, e cila prej dy vitesh operon me humbje në treg.
Qeveria ka shpallur gjendjen e emergjencës në sektorin energjetik duke detyruar kompanitë publike të energjisë të ndalojnë investimet e tyre në rrjet. Në këtë mënyrë pritet që vendi ynë të largohet gjithnjë e më shumë nga objektivi për uljen e humbjeve, që edhe në këtë nivel janë ndër më të lartat në Europë.
Kryeministri Rama shpalli një plan me tre pika për të përballuar emergjencën dhe akordoi një fond 200 milionë euro në dispozicion të OSHEE. 100 mln euro për të garantuar furnizimin me energji elektrike dhe 100 mln euro të tjera për të mbajtur të pandryshuar çmimin për biznesin e vogël dhe familjarët. Sipas Ramës, qeveria socialiste e ka ndryshuar vetëm një herë në 2015 çmimin e energjisë dhe nuk bëri me dije se çfarë do të ndodhë me biznesin e mesëm dhe të vogël.
Efektet e këtyre masave pritet të zgjasin deri në Prill 2022 sipas vendimit, atëherë dhe kur çmimet e produkteve energjetike pritet të stabilizohen sipas ekspertëve, ndoshta për të mos u kthyer më kurrë mbrapsht.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
