CEO i OpenAI, Sam Altman, e pranoi vetë se marrëveshja me Departamentin Amerikan të Mbrojtjes ishte “e nxituar” dhe se “nga jashtë nuk duket mirë”.
Ngjarjet morën kthesë të shpejtë pasi negociatat mes kompanisë Anthropic dhe Pentagonit dështuan. Presidenti Donald Trump urdhëroi agjencitë federale të ndalonin përdorimin e teknologjisë së Anthropic pas një periudhe tranzicioni 6-mujore, ndërsa Sekretari i Mbrojtjes, Pete Hegseth, e cilësoi kompaninë si rrezik për zinxhirin e furnizimit. Pak më pas, OpenAI njoftoi se kishte arritur një marrëveshje për përdorimin e modeleve të saj në ambiente të klasifikuara. Kjo ngriti menjëherë pyetje: Nëse Anthropic kishte vendosur “vija të kuqe” për moslejimin e përdorimit të teknologjisë në armë plotësisht autonome apo survejim masiv të brendshëm, dhe OpenAI pretendon të njëjtat kufizime, si arriti OpenAI marrëveshjen kur Anthropic jo?
Për t’iu përgjigjur kritikave, OpenAI publikoi një shpjegim zyrtar në blogun e saj. Kompania thekson se modelet e saj nuk mund të përdoren për:
- survejim masiv të brendshëm,
- sisteme armësh autonome,
- vendime automatike me ndikim të lartë, si p.sh. sisteme të tipit “social credit”.
Sipas OpenAI, ndryshe nga kompani të tjera që mbështeten kryesisht te politikat e përdorimit, ajo aplikon një qasje me disa shtresa sigurie. Kjo përfshin kontroll të plotë mbi mekanizmat e sigurisë, përdorim përmes cloud-it, përfshirjen e stafit të autorizuar të OpenAI në proces dhe mbrojtje të forta kontraktuale, përveç ligjeve ekzistuese amerikane.
Lexo edhe:Uljan Sharka ndërton një nga superkompjuterët më të mëdhenj për Inteligjencën Artificiale
Megjithatë, kritikat nuk munguan. Gazetari Mike Masnick nga Techdirt argumentoi se gjuha e kontratës lejon survejim të brendshëm, pasi përmend përputhshmërinë me Urdhrin Ekzekutiv 12333, një kuadër ligjor që, sipas tij, përdoret për të mbledhur komunikime jashtë SHBA-së, edhe kur ato përfshijnë qytetarë amerikanë. Nga ana tjetër, Katrina Mulligan, drejtuese e partneriteteve për sigurinë kombëtare në OpenAI, deklaroi se debati po thjeshtohet tej mase. Sipas saj, nuk është vetëm një klauzolë kontrate ajo që mbron qytetarët, por arkitektura teknike e vendosjes së teknologjisë. Duke ofruar modelet vetëm përmes API-ve në cloud, OpenAI pretendon se ato nuk mund të integrohen drejtpërdrejt në sisteme armësh apo pajisje operative.
Edhe Altman reagoi publikisht, duke pranuar se marrëveshja u bë me shpejtësi dhe solli reagime negative, madje për një moment, aplikacioni Claude i Anthropic kaloi ChatGPT në renditjen e App Store të Apple. Por ai shpjegoi se synimi ishte të ulej tensioni mes qeverisë dhe industrisë së AI.
“Nëse kjo çon në një ulje të përshkallëzimit mes Departamentit të Mbrojtjes dhe industrisë, do të dukemi si një kompani që mori mbi vete kosto për të mirën e sektorit. Nëse jo, do të vazhdojmë të shihemi si të nxituar,” tha Altman.
Debati mbi përdorimin e inteligjencës artificiale në sektorin e mbrojtjes mbetet i hapur, mes premtimeve për siguri dhe shqetësimeve për privatësinë dhe etikën.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto