OpenAI është në bisedime me fonde sovrane të pasurisë në Lindjen e Mesme, në përpjekje për të siguruar investime në kuadër të një raundi të ri financimi me vlerë shumë miliarda dollarë.
Sipas një burimi të njohur me diskutimet, raundi i financimit pritet të arrijë rreth 50 miliardë dollarë, megjithëse shifrat mund të ndryshojnë dhe ende nuk janë nënshkruar marrëveshje përfundimtare (term sheets). Burimi kërkoi të mbetet anonim për shkak të natyrës konfidenciale të negociatave. Diskutimet u raportuan fillimisht nga Bloomberg.
CEO i OpenAI, Sam Altman, ndodhet aktualisht në Emiratet e Bashkuara Arabe, ku po merr pjesë drejtpërdrejt në bisedimet me investitorët potencialë. Sipas burimit, raundi i financimit pritet të mbyllet gjatë tremujorit të parë të vitit.
OpenAI u bë katalizator i bumit global të inteligjencës artificiale pas lançimit të chatbot-it ChatGPT në vitin 2022 dhe që prej asaj kohe është shndërruar në një nga kompanitë tregtare me rritjen më të shpejtë në botë. Kompania ka mbledhur miliarda dollarë investime për të përshpejtuar zhvillimin e modeleve të reja të AI dhe për të zgjeruar gamën e produkteve dhe shërbimeve.
Gjatë vitit të kaluar, OpenAI mbylli një raund financimi prej 40 miliardë dollarësh, të udhëhequr nga SoftBank, duke u cilësuar si raundi më i madh privat i financimit në historinë e teknologjisë. Në këtë raund morën pjesë gjithashtu investitori kryesor Microsoft, si dhe fondet Coatue, Altimeter dhe Thrive.
Në tetor, OpenAI finalizoi gjithashtu një shitje aksionesh prej 6.6 miliardë dollarësh, duke e çuar vlerësimin e kompanisë në rreth 500 miliardë dollarë, një shifër që e pozicionon atë ndër kompanitë private më të vlefshme në botë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
