OpenAI kundër Elon Musk, akuza për ofertë të rreme

OpenAI i ka kërkuar gjykatës që të mos hedhë poshtë kundërpadinë ndaj Elon Musk, duke argumentuar se kërkesa e CEO-së së Tesla-s për ta pushuar çështjen “nuk mbështetet në asnjë fakt”Në një parashtresë gjyqësore të paraqitur të mërkurën mbrëma, OpenAI theksoi se kundërpadia e saj – e cila e akuzon Musk për praktika mashtruese sipas ligjit të Kalifornisë – duhet të përfshihet në procesin e përshpejtuar gjyqësor, dhe jo të shtyhet për më vonë.

Sipas OpenAI, oferta prej 97.4 miliardë dollarësh për blerjen e kompanisë nga një konsorcium i drejtuar nga Musk më herët gjatë këtij viti ishte një “ofertë e rreme” e krijuar për të gjeneruar bujë mediatike. Kompania pretendon se oferta u bë publike në media përpara se të arrinte te bordi drejtues i OpenAI.

Lexo edhe: Fortune: Mira Murati ndër 50 gratë më të fuqishme në botë

Musk, i cili ishte bashkëthemelues i OpenAI në vitin 2015 por u largua përpara se kompania të shndërrohej në një gjigant të inteligjencës artificiale, e paditi OpenAI dhe CEO-n e saj, Sam Altman, vitin e kaluar. Ai i akuzoi se kanë devijuar nga misioni fillestar i kompanisë: zhvillimi i inteligjencës artificiale për të mirën e njerëzimit dhe jo për përfitime korporative.

Në prill, OpenAI e kundërpaditi Musk, duke e akuzuar për një model të përsëritur të ngacmimit dhe duke i kërkuar një gjyqtari federal ta ndalojë nga çdo veprim i mëtejshëm “i paligjshëm dhe i padrejtë” ndaj OpenAI. Musk ka kërkuar që kundërpadia të hidhet poshtë ose të shtyhet për në një fazë të mëvonshme të procesit.