Një film që do të sjellë në ekran periudhën kaotike brenda OpenAI, kur bashkëthemeluesi dhe CEO-ja Sam Altman u largua dhe u rikthye në vetëm pesë ditë, raportohet se është në zhvillim e sipër. Sipas The Hollywood Reporter, projekti filmik titullohet “Artificial” dhe po zhvillohet nga Amazon MGM Studios
Edhe pse detajet ende nuk janë përfundimtare, burime të THR thonë se regjisori italian Luca Guadagnino — i njohur për “Call Me by Your Name” dhe “Challengers” — është në bisedime për ta drejtuar filmin. Roli i Sam Altman mendohet t’i besohet Andrew Garfield, ndërsa Monica Barbaro (“A Complete Unknown”) përflitet për rolin e ish-CTO-së Mira Murati. Aktori rus Yura Borisov (“Anora”) është përzgjedhur për të interpretuar Ilya Sutskever, bashkëthemeluesi që luajti një rol kyç në largimin e Altman.
Po ashtu, sipas raportimeve, skenari është shkruar nga Simon Rich, autor dhe skenarist i njohur i “Saturday Night Live”, çka sugjeron se filmi do të përmbajë elementë të theksuar komikë. Një qasje satirike duket e përshtatshme, duke marrë parasysh absurditetin e ngjarjeve që ndodhën dhe faktin që bota e inteligjencës artificiale shpesh ecën në kufijtë e të pabesueshmes.
Lexo edhe: Google shpalos të ardhmen, prezanton robotët që “mendojnë”
Ngjarja në fjalë ndodhi në nëntor të vitit 2023, kur Sam Altman u shkarkua papritur nga detyra si CEO dhe gjithashtu hoqi dorë nga vendi në bord. Arsyeja zyrtare ishte humbja e besimit nga ana e bordit në aftësinë e tij për të udhëhequr. Por vetëm pesë ditë më vonë, pas një vale reagimesh publike dhe negociatash të ethshme, Altman u rikthye në drejtimin e OpenAI.
Pavarësisht se cilët aktorë do të përfshihen përfundimisht, mbetet për t’u parë se si do të portretizojë “Artificial” dramën brenda kompanisë që ndodhet në zemër të revolucionit të inteligjencës artificiale. Interesi i publikut pritet të jetë i lartë, veçanërisht tani që mjete si ChatGPT janë bërë pjesë e përditshmërisë globale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
