Obama kërkon ndihmën e rrjeteve sociale

Presidenti Barak Obama i ka kërkuar rrjeteve sociale si Facebook, Twitter apo Google ndihmë për të luftuar grupin terrorist ISIS. Gjatë një fjalimi televiziv ditën e dielë  Presidenti Amerikan shpalosi strategjinë e Shteteve të Bashkuara në luftën kundër terrorizmit dhe iu kërkoi ndihmë gjigandëve teknologjikë për të penguar përdorimin e rrjeteve sociale nga grupet ekstremiste. Ky fjalim u mbajt pas aktit terrorist javën e kaluar në San Bernardino ku ngelën të vrarë 14 amerikanë.

Bashkëpunimi midis Facebook, Twitter dhe Google me shtetet perëndimore dhe në veçanti me shërbimet informative nuk ka munguar. Këto 3 kompani kanë një politikë kundra gjuhës së urrejtjes të përdorur në faqet e tyre. Administrata e Obamës pritet që të takohet me kompanitë teknologjike ditët në vazhdim për të qartësuar politikat e rrjeteve sociale kundra promovimit të terrorizmit.  Qeveria Amerikane do të pengojë organizimin e sulmeve terroriste që planifikohen në mediat sociale. Facebook, Twitter dhe Google janë takuar të enjten me Kryeministrin Francez dhe zyrtarë të Komisionit Europian të cilët kanë pasur të njëjtat kërkesa.

Rrjetet sociale thonë se nuk bëjnë dallime midis ankesave të qeverive dhe të qytetarëve të thjeshtë. Megjithëse burime nga Reuters pohojnë se qeveritë kanë një kontakt joformal  me gjigandët teknologjikë.Të premten Facebook fshiu profilin e Tashfeen Malik, një nga dy të akuzuarit e sulmit terrorist në Kaliforni. Profili i Malik promovonte një propagandë pro-ISIS. Malik u eliminua nga policia pas një shkëmbimi zjarri.

Facebook , Twitter dhe Google janë kthyer tashmë në aktorë politikë të mirëfilltë.