Çmimi Nobel për Fizikë u është ndarë tre shkencëtarëve: francezit, Alain Aspect, amerikanit, John Clauser dhe austriakut, Anton Zeilinger, për zbulimet e tyre në fushën e mekanikës kuantike. Puna e tyre befasuese i hap derën një dimensioni të ri, atë të punuarit në super kompjuterë dhe komunikimit të koduar.
Tre shkencëtarët u vlerësuan nga komiteti i Nobelit, për përparimet e tyre në atë që njihet si mekanika kuantike , studimin e sjelljes së fotoneve dhe atomeve. Zbulimet e tyre kanë shtuar dhe çuar më tej punën e John Stewart Bell, teorema e të cilit ndryshoi kuptimin e botës shkencore për mekanikën kuantike.
Puna e treshes “ka hedhur themelet për një epokë të re të teknologjisë kuantike”, tha Akademia Mbretërore Suedeze e Shkencave.
Ky çmim – i vjetër më shumë se një shekull – ka vlerën e 902.315 dollarëve amerikanë, dhe ndahet nga Akademia Mbretërore e Shkencave e Suedisë. Nobeli për Fizikë është çmimi i dytë që ndahet këtë javë, pasi suedezi, Svante Paabo është nderuar në fushën e Mjekësisë më 3 tetor.
Në ditët në vazhdim do të ndahen çmimet Nobel për Paqe, Letërsi, Kimi dhe Ekonomi. Ceremonia zyrtare e ndarjes së çmimeve mbahet më 10 dhjetor, për të shënuar përvjetorin e vdekjes së Alfred Nobelit (1833-1896) I njohur për shpikjen e dinamitit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
