Ka pasur shumë studime mbi pesë gjuhët e dashurisë, por një studim i ri tregon se në të vërtetë ekzistojnë gjashtë lloje të ndryshme të dashurisë, dhe secila aktivizon një pjesë të ndryshme të trurit.
Ne përdorim fjalën “dashuri” në një gamë të gjerë kontekstesh – nga adhurimi seksual te dashuria prindërore dhe dashuria për natyrën. Një studim i publikuar në Cerebral Cortex zbuloi se e njëjta fjalë aktivizonte pjesë të ndryshme të trurit në varësi të përvojës njerëzore.
Në studim morën pjesë 55 prindër, të cilët e përshkruanin veten si të përfshirë në një marrëdhënie dashurie. Atyre iu paraqitën disa skenarë të thjeshtë. Studiuesit përdorën skanime MRI për të matur aktivitetin e trurit ndërsa pjesëmarrësit reflektonin mbi tregime që lidhen me gjashtë lloje të ndryshme dashurie, përfshirë:
- Dashuria romantike
- Dashuria prindërore
- Dashuria për një mik
- Dashuria për një të huaj
- Dashuria për një kafshë shtëpiake
- Dashuria për natyrën
Për shembull, për të vlerësuar dashurinë prindërore, një nga skenarët përfshinte pjesëmarrësit që kujtonin momentin kur panë për herë të parë foshnjën e tyre. “Ju shihni fëmijën tuaj të sapolindur për herë të parë. Foshnja është e butë, e shëndetshme dhe e fortë – mrekullia më e madhe e jetës tuaj. Ju ndjeni dashuri për të voglin tuaj,” shkruanin studiuesit si një nga skenarët. Aktivizimet e dashurisë u kontrolluan gjithashtu me tregime neutrale, ku ndodhnin pak gjëra, si p.sh., shikimi nga dritarja e autobusit apo larja e dhëmbëve me mendje të shpërqendruar.
Studiuesit zbuluan se dashuria prindërore, ose dashuria për fëmijët e dikujt, gjeneronte aktivitetin më intensiv të trurit, ndjekur ngushtë nga dashuria romantike. “Në dashurinë prindërore, kishte një aktivizim të thellë në sistemin shpërblyes të trurit,” tha Pärttyli Rinne, bashkëautor i studimit dhe studiues në Universitetin Aalto në Finlandë, duke shtuar se një aktivitet kaq intensiv i trurit “nuk u pa për asnjë lloj tjetër dashurie.”
Lexo edhe:5 arsye për të qenë optimistë për ekonominë e 2025
Për habi, të gjitha llojet e dashurisë midis njerëzve dukeshin se aktivizonin të njëjtat zona të trurit, pavarësisht nga afërsia e marrëdhënies, por ndryshonin vetëm në intensitetin e aktivizimit të trurit. Studimi zbuloi gjithashtu se dashuria e dhembshur për të huajt ishte më pak shpërblyese dhe shkaktonte më pak aktivizim të trurit sesa dashuria në marrëdhënie të ngushta.
Nga ana tjetër, studiuesit zbuluan se dashuria për natyrën ndezte sistemin shpërblyes të trurit, ndryshe nga zonat e lidhura me njohjen sociale, të cilat ndizeshin nga dashuria midis njerëzve. Ata zbuluan gjithashtu se kur pjesëmarrësit flisnin për kafshët, valët e tyre të trurit treguan nëse personi kishte një kafshë shtëpiake apo jo. “Kur shikojmë dashurinë për kafshët shtëpiake dhe aktivitetin e trurit që lidhet me të, zonat e trurit të lidhura me [lidhjen sociale] tregojnë nëse personi ka një kafshë shtëpiake apo jo. Për pronarët e kafshëve shtëpiake, këto zona aktivizohen më shumë sesa tek ata që nuk kanë kafshë,” vuri në dukje Rinne.
Këto zbulime sugjerojnë se, si përgjigje ndaj ndjenjave të dashurisë, aktiviteti i trurit ndikohet jo vetëm nga afërsia e marrëdhënies me objektin e dashurisë, por edhe nga fakti nëse është një qenie njerëzore, një specie tjetër, apo natyra. “Ne tani ofrojmë një pamje më gjithëpërfshirëse të aktivitetit të trurit që lidhet me lloje të ndryshme të dashurisë sesa hulumtimet e mëparshme,” theksoi Rinne në deklaratën për shtyp. Edhe pse kjo mund të mos tingëllojë shumë romantike, kuptimi i mënyrës se ku truri ndjen lloje të ndryshme dashurie mund të jetë thelbësor në trajtimin e çrregullimeve të lidhjes, depresionit dhe problemeve të marrëdhënieve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
