Edukimi financiar i fëmijëve po shihet me vëmendje së fundi, si një mundësi për t’u pasuruar me njohuri në fushën financiare që në moshë të re.
Fation Ceka, është një nga autorët e fundit në këtë fushë, i cili sjell në Kindle, librin për edukimin financiar të fëmijëvë. “The Animal Friends Learn About Financial Markets”, quhet libri, frut i punës së bërë me pasion nga Ceka.
Ju keni sjellë një libër interesant, të përshtatur për fëmije? Çfarë synoni kryesisht?
Ka disa arsye për të shkruar një libër për fëmijë që flet për financën dhe investimet. Së pari, edukimi i fëmijëve për konceptet financiare bazë është një aftësi jetësore që nuk gjendet gjithmonë në shkollë. Duke u ofruar fëmijëve një fillim (shpresoj) të mirë në botën e financave dhe investimeve, mund t’u japim atyre mundësinë të marrin vendime të informuara rreth të ardhmes së tyre financiare. Përveç kësaj, prezantimi i koncepteve bazë financiare dhe investimeve tek fëmijët në moshë të re, mund të ndihmojë në promovimin e zakoneve financiare të shëndetshme dhe menaxhimit të përgjegjshëm të parave në të ardhmen. Gjithashtu, kjo mund të inkurajojë mendimin afatgjatë, vendosjen e qëllimeve dhe planifikimin, të cilat janë aftësi të rëndësishme që do t’u shërbejnë fëmijëve gjatë gjithë jetës. Promovimi i njohurive financiare tek fëmijët është gjithashtu i rëndësishëm për krijimin e një shoqërie më të ditur financiarisht. Duke ofruar libra të aksesueshëm dhe argëtues mund të ndihmojmë në promovimin e njohurive financiare dhe investimeve tek të gjithë, duke përfshirë edhe fëmijët.
Në përgjithësi, shkrimi i një libri për fëmijë që flet për financat dhe investimet është një hap i rëndësishëm në promovimin e edukimit financiar, duke u dhënë fëmijëve mundësinë të marrin vendime të informuara për të ardhmen e tyre financiare, duke i inkurajuar ata të mendojnë afatgjatë, për të vendosur qëllime, për të planifikuar, dhe për të krijuar një shoqëri me nivel të lartë njohurish financiare.
Çfarë moshe i drejtohet ky libër?
Libri mund të lexohet nga fëmijë mbi moshën 7 vjeç. Normalisht që shumë nga konceptet në këtë histori janë disi të komplikuara për t’u kuptuar, jo vetëm nga fëmijët, por dhe nga të rritur. Synimi i librit është që fëmijët të njihen me botën e financës dhe investimeve dhe jo domosdoshmërisht të kuptojnë totalisht këto koncepte të prezantuara pasi kjo histori e shkurtër prek vetëm majën e akullnajës së botës së financës.
Cilat janë mesazhet kryesore që jepni?
Mesazhet kryesore në historinë “The Animal Friends Learn About Financial Markets” janë:
1- Libri është një histori argëtuese dhe edukative për lexuesit e rinj, që i mëson ata rreth financave dhe investimeve përmes aventurave të një grupi kafshësh.
2- Historia thekson rëndësinë e të kuptuarit të llojeve të ndryshme të investimeve, si aksionet dhe obligacionet dhe rëndësinë e diversifikimit për të menaxhuar rreziqet.
3- Miqtë e kafshëve mësojnë për rreziqet dhe përfitimet e investimit dhe se si të krijojnë një plan financiar për të arritur qëllimet e tyre me drejtimin e mentorit të tyre.
4- Gjithashtu, në histori diskutohet rëndësia e këmbënguljes, durimit dhe vendosmërisë përballë sfidave.
5- Libri inkurajon lexuesit të kenë një pikëpamje afatgjatë të qëllimeve të tyre financiare dhe ofron një mesazh frymëzues dhe fuqizues për vlerën e kursimit, investimit dhe planifikimit për të ardhmen.
Nga lindi frymëzimi dhe nxitja për të realizuar këtë libër?
Fëmijët po rriten shumë më shpejt dhe po mësojnë shumë më herët në jetën e tyre për gjëra, të cilat mosha ime i ka hasur relativisht vonë. Duke kërkuar për libra për të blerë për fëmijët e shoqërisë time, gjithmonë shikoj që fëmijët janë shumë më të avancuar se librat që shkruhen për ta. Kjo në asnjë mënyrë nuk do thotë që fëmijët domosdoshmërisht duhet të mësojnë për financen, por fëmijëve u duhet një orientim ose një material, i cili i sfidon të mendojnë përtej materialeve standarde të shkollave.
Më kujtohet vetja kur për herë të parë lexova “Black Holes and Baby Universes and Other Essays”, një libër i Stephen Hawking, kur isha 10 ose 11 vjeç. Nuk kuptova asnjë gjë nga libri, por fakti që dikush kishte shkruar për diçka që nuk kisha asnjë njohuri, në një mënyrë më krijoj nevojën të bëhem kërkues ndaj vetes. Për “The Animal Friends Learn About Financial Market”, ishte mungesa e njohurive financiare tek shumë njerëz. që më motivoi të shkruaj këtë histori të shkurtër. Doja të krijoja një histori që mund t’i ndihmonte fëmijët të kuptojnë bazat e financës dhe të investimeve në një mënyrë argëtuese dhe tërheqëse. Njohuritë financiare janë të rëndësishme për të gjithë dhe doja të kontribuoja në një botë, ku më shumë njerëz mund të marrin vendime të informuara për paratë e tyre.
Gjithashtu, besoj në fuqinë e arsimit për të krijuar një shoqëri më të barabartë dhe doja të ndihmoja t’u ofrojmë njohuri financiare fëmijëve nga të gjitha shtresat. Libri për momentin është vetëm në kindle, pasi mendoj që të gjithë prindërit duhet të bëjnë investimin për fëmijët e tyre dhe t’i shtyjnë ata të lexojnë, duke bërë një nga abonimet e Amazon.
Si po arrini tek lexuesi dhe çfarë do ta pasojë këtë libër?
Shkrimi i kësaj historie, si dhe të tjera materiale që kam krijuar, është thjesht një hobby. Në asnjë mënyrë nuk e konsideroj veten shkrimtar dhe as nuk mendoj që mund të bëhem një shkrimtar i mirëfilltë. E vlerësoj shumë artin e të shkruarit për të menduar që dikush që merret me shkrimin si hobby mund ta konsiderojë veten shkrimtar. Nuk kam asnjë strategji shpërndarje të këtij libri, as atyre që mund të publikoj në të ardhmen. Libri gjendet në Amazon Kindle. Nga këto pak ditë që libri është publikuar, kam patur shumë mesazhe nga miq që e kërkojnë të printuar. Mbase në të ardhmen kur të bëhen disa publikime, mund të mblidhen në një koleksion.
Sa i vështirë ishte thjeshtimi i gjuhës së komunikimit, sjellja e mesazheve të mëdha në formë të thjeshtë dhe të përshtatshme për fëmijë?
Thjeshtimi i gjuhës dhe shpjegimi i koncepteve komplekse financiare në një mënyrë që do të ishte e kuptueshme për fëmijët është padyshim një sfidë e madhe. Doja të sigurohesha që historia është tërheqëse dhe e arritshme për lexuesit e të gjitha moshave, duke përcjellë me saktësi koncepte të rëndësishme financiare. Duhet shumë kërkim dhe konfigurim i vazhdueshëm për të distiluar informacionin deri në elementët e tij më thelbësorë dhe për ta paraqitur atë në një mënyrë, që do të ishte tërheqëse dhe e lehtë për t’u kuptuar. Është një proces sfidues, por dhe shpërblyes, pasi besoj se edukimi financiar është i rëndësishëm për ta kuptuar nga njerëzit e të gjitha moshave.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
