Po bëhet gjithnjë e më e mundshme që çdo marrëveshje për shitjen e TikTok mund të nënkuptojë që përdoruesit në SHBA do të duhet të shkarkojnë një aplikacion të ri. Dhe kjo mund të sjellë një përvojë thuajse krejtësisht të ndryshme.
Pas shtyrjes së vazhdueshme të zbatimit të një ligji që kërkon nga kompania mëmë e TikTok në Kinë, ByteDance, që ta shesë platformën ose përndryshe të ndalohet në SHBA, presidenti Donald Trump tani thotë se ka një blerës për aplikacionin. Ndërkohë, sipas burimeve të cituara nga The Information, TikTok është në fazën e ndërtimit të një versioni të ri të aplikacionit vetëm për SHBA-në, i cili mund të lançohet që më 5 shtator. Lajmi për një aplikacion të ri nuk është plotësisht surprizues. Një ndër çështjet kyçe është ajo që shpesh përshkruhet si “salsa sekrete” e TikTok – algoritmi që fuqizon faqen shumë të ndjekur “For You”. Qeveria kineze ka deklaruar vazhdimisht se do të bllokojë çdo transferim të këtij algoritmi tek një pronar i ri, që do të thotë se çdo version amerikan i veçuar i TikTok do të duhet të ketë një algoritëm të ri, të ndërtuar nga e para. Megjithatë, ky është një tjetër kujtesë se çdo marrëveshje mund të sjellë pasoja të mëdha për 170 milionë përdoruesit amerikanë të TikTok, duke ndryshuar ndjeshëm aspekte të rëndësishme të platformës, si përmbajtja që shohin apo me kë mund të ndërveprojnë.
Një aplikacion i ri?
Sipas The Information, duke cituar dy burime të paidentifikuara, aplikacioni aktual i TikTok do të hiqet nga platformat e shkarkimit në SHBA ditën kur të lançohet aplikacioni i ri. Megjithatë, përdoruesit ekzistues mund të vazhdojnë ta përdorin versionin aktual deri në marsin e vitit të ardhshëm. (Burime pranë procesit thonë se afatet mund të ndryshojnë.) Transferimi i profileve dhe përmbajtjes së përdoruesve ekzistues drejt aplikacionit të ri do të përbëjë një sfidë teknike, sipas raportit. Kjo lëvizje mund ta bëjë gjithashtu më të vështirë për përdoruesit amerikanë të shohin përmbajtje nga vende të tjera dhe anasjelltas. Këto ndryshime mund të çojnë në largimin e disa përdoruesve nga platforma, sipas avokatit Jim Johnston nga firma ligjore Davis+Gilbert në Nju Jork. Gjithsesi, raporti sugjeron se qëndrimi i TikTok mbi krijimin e një aplikacioni të veçantë për SHBA ka ndryshuar që prej janarit, kur një avokat i kompanisë i tha Gjykatës Supreme se do të duheshin “shumë vite” për të ndërtuar një version të ngjashëm të aplikacionit për përdoruesit amerikanë. Ai gjithashtu kishte deklaruar se do të ishte “një platformë thelbësisht e ndryshme me përmbajtje të ndryshme.” Kjo mund të mbetet e vërtetë edhe nëse TikTok nuk po e përdor më si arsye për të mos ndërtuar një version amerikan të aplikacionit.
Lexo edhe:“Avenirs” – Kur teknologjia bëhet busull për zgjedhjet jetësore të të rinjve
Pse po ndodh kjo?
ByteDance ka pasur afat për të gjetur një pronar të ri për operacionet e TikTok në SHBA që nga koha kur ish-presidenti Joe Biden nënshkroi ligjin “shes ose ndalo” vitin e kaluar për shkak të shqetësimeve për sigurinë kombëtare. Ligji hyri në fuqi në janar, pasi u konfirmua edhe nga Gjykata e Lartë. Edhe pse ligji lejonte vetëm një shtyrje të afatit të ndalimit, Trump e ka shtyrë zbatimin e tij tri herë, duke thënë se dëshiron ta “shpëtojë TikTok” duke ndërmjetësuar një marrëveshje për ta kaluar kontrollin e platformës tek pronarë amerikanë. ByteDance ka afat deri më 17 shtator për ta shitur aplikacionin ose për t’u përballur me ndalim në SHBA. Trump tha javën e kaluar se një grup personash “shumë të pasur” janë gati për të blerë operacionet e TikTok në SHBA dhe pritet të zbulohen së shpejti. Megjithatë, nuk është e qartë nëse qeveria kineze ka dhënë miratimin përfundimtar për këtë marrëveshje. Të hënën, qeveria kineze shmangu çdo përgjigje të qartë lidhur me statusin e negociatave. “Lajmi që TikTok po punon për një aplikacion të ri për SHBA-në i jep besueshmëri deklaratës së shkurtër të presidentit Trump se jemi afër një marrëveshjeje, e cila… ishte parë me skepticizëm për shkak të shtyrjeve të shumta,” tha Johnston. “Sfida kryesore gjithmonë ka qenë nga pala kineze,” shtoi ai. “Ka shumë entitete amerikane të interesuara për ta blerë TikTok, por nga ana kineze nuk ka pasur vullnet për ta shitur.”
A do të jetë aplikacioni i ri në përputhje me ligjin?
Sipas ligjit, pas shitjes, TikTok-i amerikan nuk mund të vazhdojë të bashkëpunojë me ByteDance për të operuar algoritmin apo për të ndarë të dhënat e përdoruesve. Kjo do të thotë se ByteDance mund të mbajë një pjesë të vogël të aksioneve financiare në entitetin e ri, një opsion që Shtëpia e Bardhë e ka konsideruar, por aplikacioni i ri do të duhet të ketë një algoritëm tërësisht të ndarë për të qenë në përputhje me ligjin. Ligji gjithashtu kërkon që, në çdo skenar shitjeje, të dhënat e përdoruesve amerikanë të qëndrojnë të ndara nga të dhënat e përdoruesve të tjerë të platformës. Një aplikacion i ri mund ta ndihmojë këtë proces. Megjithatë, disa ekspertë ligjorë thonë se administrata Trump nuk ka ndjekur plotësisht ligjin deri më tani, duke e shtyrë zbatimin e tij disa herë, edhe pse legjislacioni lejonte vetëm një shtyrje prej 90 ditësh nëse kishte një marrëveshje në proces. Dhe është presidenti ai që vendos nëse ka ndodhur apo jo një “shitje e kualifikuar”, sipas ligjit. “Nëse arrin të ndërmarrësh disa veprime që e bëjnë të duket sikur po afrohet marrëveshja, ndoshta kjo do të mjaftojë,” tha Gautam Hans, profesor në Fakultetin e Drejtësisë në Cornell. TikTok mund të ketë kuptuar se edhe nëse administrata Trump përpiqet ta mbrojë, administratat e ardhshme mund të ndërmarrin veprime ligjore ndaj aplikacionit ose partnerëve të tij teknologjikë, përfshirë platformat e shkarkimit apo kompanitë e cloud-it — për shkelje të ligjit. Javën e kaluar, Anthony Tan, aksioner i Google, i cili paditi kompaninë për rikthimin e TikTok në dyqanin e aplikacioneve, publikoi letra që Prokurorja e Përgjithshme Pam Bondi i kishte dërguar Google dhe partnerëve të tjerë teknologjikë të TikTok, duke u thënë se nuk do të mbaheshin përgjegjës për shkelje të ligjit duke vazhduar mbështetjen për TikTok. Ai i siguroi këto letra përmes një kërkese zyrtare për informacion. Këto letra mbështeten në një argument ligjor që profesori i ligjit në Georgetown dhe kontribues në CNN, Steve Vladek, e quajti “marrëzi” në buletinin e tij të kësaj jave, duke argumentuar se kompanitë ende mund të përballen me pasoja ligjore në të ardhmen, pavarësisht garancive të Bondi-t. “Një ditë mund të ketë një ndryshim politik, dhe ndoshta do të ketë llogaridhënie,” tha Hans. “Pra, nëse jam kompania, ndoshta jam i kënaqur me atë që po ndodh sot, por duhet të mendoj për të ardhmen.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
