Zhvillimi i turizmit vitet e fundit ka nxitur mjaft qytetarë të kthehen nga emigrimi me synim investimin në këtë fushë.
Një ndër ta është Alfred Zhuli i kthyer pas 23 vitesh nga ishulli i Mykonos në Greqi i cili shndërroi banesën e vet në lagjen Cfakë të Gjirokastrës në një ambient akomodimi në shërbim të turizmit.
Ai shfrytëzoi eksperiencën e marrë si punonjës i hotelerisë në një nga perlat e turizmit ndërkombëtar të vendit helen. Për Alfredin ky është sezoni I parë që pritet të vjelë frytet e investimit të ngritur me mund e djersë, ndërsa pritshmëritë janë të larta.
Me përvojën e fituar në fushën e turizmit kur punonte emigrant dhe tashmë një investitor, Alfredi e shikon kthimin në vendlindje si një mundësi për të përmirësuar të ardhurat financiare.
Qyteti i gurtë tërheq në çdo stinë të vitit turistë të shumtë vendas dhe të huaj, ndërsa ndodhet prej 18 vitesh nën mbrojtjen e UNESCO-s e vlerësuar për arkitekturën, historinë dhe traditën.
Në një rrëfim administratori Zhuli shprehet se bujtinën e tij e realizoi me kursimet e tij nga emigrimi dhe në këtë banesë shfrytëzoi eksperiencën e marrë si punonjës i hotelerisë në një nga perlat e turizmit ndërkombëtar të vendit helen siç është Mykonos. Ky ambient akomodimi ka dy dhoma dhe një suitë. Ndërkaq ka synimin që ta zgjerojë akoma më tepër kapacitetin.
Ai e ka hapur bujtinën sivjet dhe është sezoni i parë për të. Sipas tij pritshmëritë tani me fluksin e turistëve janë më se të larta për vetë faktin se Gjirokastra, edhe për asetet që mbart, ka perspektivë dhe të ardhme të ndritur në këtë sektor.
Zhuli rrëfen se turistët e parë kanë ardhur nga Franca dhe Italia dhe kanë mbetur të impresionuar nga mikpritja dhe asetet që ofron qyteti i gurtë.
Zhuli ka një apel ndaj bashkëqytetarëve të tij kryesisht atyre që jetojnë në emigrim të kthehen në vendlindje të investojnë në dobi të turizmit pasi është një mundësi shumë e mirë për të siguruar burime financiare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
