Nga 1 prilli me TVSH, Ilir Binaj: Sipërmarrjet të papërgatitura

Nga fillimi i muajit të ardhshëm gati 10 mijë sipërmarrje në vend, do të duhet të paguajnë Tatim mbi Vlerën e Shtuar. Ulja e pragut për xhiro pa TVSH deri në 2 milionë lekë në vit, ka bërë që edhe sipërmarrjet e vogla tregtare me xhiro mesatare 5500 lekë në ditë, të jenë subjekt TVSH-je.

Sipas të dhënave të Qendrës Kombëtare të Biznesit, numri i çregjistrimit është rritur ndjeshëm këto muaj aq sa Drejtoria e Përgjithshme e Tatimeve të dalë me një deklaratë, ku e cilësonte këtë një skemë për t’iu shmangur TVSH-së.

Lexoni: https://businessmag.al/tatimet-kujdes-me-mbylljen-e-bizneseve-per-te-shmangur-tvsh/

I pyetur nga Businessmag.al, eksperti kontabël Ilir Binaj thekson se, “bizneset nuk kanë bërë asnjë përgatitje për të punuar me TVSH pas pak ditësh”. Ai beson së shumë prej tyre janë çregjistruar pikërisht për t’iu shmangur kësaj.

Në fakt kohët e fundit, edhe Konfindustria e cila prej vitesh kërkon formalizim të gjithë zinxhirit të shitjes, ka theksuar se sipërmarrja është e pa përgatitur, duke kërkuar shtyrjen e afatit.

Lexoni: https://businessmag.al/konfindustria-te-shtyhet-afati-i-tvsh-per-biznesin-e-vogel-rrezikohet-rritja-e-papunesise/

Kontabilisti Binaj nuk e sheh me rëndësi këtë aplikim as për buxhetin e shtetit. I pyetur për efektet ai thotë se në afat-shkurtër do të ketë frustrim të biznesit familiar me efekte shumë minimale në formalizim. Në një periudhë afatgjatë pritet që efektet të jenë edhe më të padukshme.