Netflix po synon të fitojë edhe më shumë familje me lançimin e Netflix Playground, një aplikacion i ri i dedikuar për lojëra, i ndërtuar posaçërisht për fëmijët deri në moshën 8 vjeç. Aplikacioni nuk përmban reklama, nuk ka blerje brenda lojës dhe nuk kërkon pagesa shtesë përtej abonimit ekzistues në Netflix. Aktualisht është i disponueshëm në SHBA, Kanada, Mbretërinë e Bashkuar, Australi, Filipine dhe Zelandën e Re, ndërsa lançimi global pritet më 28 prill.
Përdorimi i aplikacionit është shumë i thjeshtë: mjafton ta shkarkoni në telefon ose tablet, të hyni me llogarinë tuaj të Netflix dhe fëmijët mund të aksesojnë menjëherë një bibliotekë në rritje lojërash me personazhe që ata tashmë i njohin dhe i duan. Në lojë shfaqen figura si Peppa Pig, Elmo, Big Bird, Cookie Monster, Storybots, Horton dhe të tjerë, të cilët bëhen pjesë e aktiviteteve të ndryshme interaktive.
Përmes këtyre lojërave, fëmijët mund të kujdesen për kafshë të vogla si lepuj apo guinea pigs, të përgatisin smoothie, të zhvillojnë kujtesën me lojëra të tipit “memory matching”, të lidhin pikat, apo të eksplorojnë lojëra që mësojnë lidhjen shkak-pasojë. Ka edhe elementë kreativë dhe argëtues, si krijimi i këngëve me efekte humoristike në lojën “Bad Dinosaurs”.
Një nga avantazhet më të mëdha të Netflix Playground është fakti që të gjitha lojërat funksionojnë edhe offline. Kjo e bën aplikacionin shumë praktik për udhëtime të gjata apo situata ku nuk ka internet të qëndrueshëm.
Paralelisht me këtë iniciativë, Netflix ka njoftuar edhe projekte të reja për fëmijë, përfshirë një serial të ri animacioni për parashkollorët, “Young MacDonald”, krijuar nga Gabrielle Meyer, e njohur për “Ada Twist, Scientist”. Seriali ndjek historinë e Mac, nipit të Old MacDonald, dhe aventurat e tij në fermë së bashku me një derr të quajtur Dumpling.
Gjithashtu, disa nga serialet e njohura si “Trash Truck” dhe “The Creature Cases” janë rinovuar me sezone të reja, ndërsa gjatë verës 2026 pritet rikthimi i shumë titujve të dashur për fëmijët, si “CoComelon Lane”, “Ms. Rachel”, “Mark Rober’s CrunchLabs”, “Sesame Street” dhe filmi “Gabby’s Dollhouse”.
Përpjekjet e Netflix në fushën e lojërave nuk kanë pasur suksesin e pritur deri tani, pjesërisht për shkak se kompania nuk ka aq shumë personazhe ikonike sa rivalë si Disney+. Megjithatë, fokusimi tek përmbajtja për fëmijë mund të jetë një strategji e zgjuar, pasi familjet me fëmijë të vegjël kanë më pak gjasa të heqin dorë nga abonimi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
