Netflix prezanton chatbot-in e ri me inteligjencë artificiale

E kemi përjetuar të gjithë: ulesh para ekranit, rrotullon pafundësisht në Netflix, kalon kategori të panumërta, dhe sërish nuk gjen asgjë për të parë. Në fakt, ndonjëherë duket sikur harxhojmë më shumë kohë duke kërkuar se sa duke parë.

Për të zgjidhur këtë lodhje të përhershme të shfletimit, Netflix ka ofruar mjete të ndryshme, nga algoritmet e famshme të rekomandimeve deri te butoni “Play Something”. Por tani, kompania po fut në lojë një ndihmës të ri: një chatbot me inteligjencë artificiale.

Ky chatbot i ri, i cili do të dalë së shpejti në një version beta të kufizuar dhe me regjistrim vullnetar, do të jetë pjesë e aplikacionit të Netflix për iOS. Ai do t’ju ndihmojë të kërkoni për filma dhe seriale duke përdorur gjuhë të thjeshtë dhe bisedore, në vend që të kaloni kategori pafund.

Shembull? Mund të shkruani diçka si: “Dua diçka gazmore dhe pozitive” ose “Më duhet diçka e frikshme, por jo shumë e frikshme” dhe chatbot-i do t’ju përgjigjet me sugjerime si: “Vetëm energji pozitive: këto komedi do t’ju bëjnë të buzëqeshni, të qeshni, ose të dyja.”

Lexo edhe: Pas fitimeve marramendëse, Netflix nis epokën e AI: Kush do mbetet pa punë?

Po çfarë e bën këtë ndryshe nga kërkimi i zakonshëm në Netflix? Sipas kompanisë, chatbot-i do të jetë më i ndjeshëm ndaj frazave të paqarta që zakonisht nuk japin rezultat në motorin standard të kërkimit.

Krahas chatbot-it, Netflix po përgatit edhe ndryshime të mëdha në faqen kryesore të aplikacionit, si zhvendosja e shkurtesave të rëndësishme si “Kërko” dhe “Lista ime” nga ana e majtë në krye të ndërfaqes.

Së fundmi, për përdoruesit në celularë, pritet të vijë një “feed” në stilin e TikTok, me video vertikale nga filmat dhe serialet e Netflix. Do të mund të klikoni për ta parë menjëherë videon, për ta shtuar në listën tuaj ose për ta ndarë me miqtë.