Netflix mund të jetë duke u përballur me një sfidë të madhe dhe ajo është Kina. Gjigantët kinezë të transmetimit online po fitojnë me shpejtësi terren ndaj rivalëve amerikanë në tregun në lulëzim të Azisë Juglindore. Sipas një raporti të Nikkei Asia, kompani si iQiyi dhe Tencent po investojnë fuqishëm duke u fokusuar te prodhimi i përmbajtjes origjinale të përshtatur për audiencat lokale.
iQiyi, “Netflix-i i Kinës”
I quajtur shpesh “Netflix-i i Kinës”, iQiyi, një filial i Baidu ka nisur zgjerimin në Azinë Juglindore që prej vitit 2019 dhe tashmë ka një prani të fortë në Tajlandë, Indonezi dhe Malajzi. Platforma ka tërhequr mbi 36 milionë abonentë mujorë në rajon duke ofruar një kombinim mes shërbimit falas me reklama dhe abonimeve me tarifa të përballueshme. Vetëm në Tajlandë, biblioteka e iQiyi numëron mbi 9,000 tituj, ku më shumë se 60% janë prodhime kineze. Përmbajtja varion nga dramat historike kineze te filmat hollivudianë, por fokusi kryesor është te investimi në prodhime lokale. Kompania planifikon të shpenzojë deri në 1.54 milionë dollarë për çdo prodhim dhe të publikojë 4–6 tituj tajlandezë çdo vit, duke synuar gjinitë popullore si dramat “boys’ love” dhe “girls’ love”. Në Indonezi dhe Malajzi, iQiyi po bashkëpunon me studio lokale dhe operatorë si Telkomsel, që ka mbi 170 milionë abonentë. Në Kinë, iQiyi rivalizon drejtpërdrejt me Tencent Holdings dhe Alibaba Group, duke regjistruar mbi 400 milionë përdorues aktivë mujorë.
Tencent, nga ana e saj, ka lançuar shërbimin WeTV në Azinë Juglindore në vitin 2019 dhe po ndjek një strategji të ngjashme për përmbajtje origjinale. Që nga viti 2024, kompania ka nisur prodhimin e programeve lokale të idhujve muzikorë, duke sjellë grupe të suksesshme si NexT1de, një boyband me shtatë anëtarë. Më herët këtë vit, iQiyi njoftoi se do të hapë parkun e saj të parë tematik, të quajtur “iQiyi Land”, në qytetin Yangzhou, provinca Jiangsu, vetëm dy orë larg nga Shangai me trenin e shpejtësisë së lartë. Parku do të bazohet në personazhet e shfaqjeve origjinale të kompanisë. Edhe pse shërbime amerikane si Netflix dhe Amazon Prime Video hynë në rajon rreth vitit 2016 dhe ruajnë pozita të forta – p.sh. në Singapor kanë gati 60% të tregut, kompanitë kineze po mbyllin me shpejtësi hendekun. Në Tajlandë, ato zotërojnë tashmë 40% të tregut, duke kaluar për herë të parë shërbimet amerikane që mbajnë rreth 30%.
Një faktor i rëndësishëm është prania e madhe e diasporës kineze në Azinë Juglindore dhe popullariteti në rritje i përmbajtjes kineze. Një tjetër arsye është konkurrenca e ashpër në tregun e brendshëm kinez, ku të ardhurat dhe fitimet janë në rënie. Për këtë arsye, kompanitë po shohin drejt tregjeve të jashtme. Me një popullsi të re dhe të ardhura në rritje, Azia Juglindore shihet si një mundësi gjigante. Vetëm tregu i transmetimit online në këtë rajon pritet të arrijë në 6.8 miliardë dollarë deri në vitin 2030, një rritje prej 49% krahasuar me vitin 2024.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
