Han Jong-Hee, një ndër CEO-t e Samsung Electronics, ka ndërruar jetë ditën e martë si pasojë e një arresti kardiak, bëri të ditur një zëdhënës i gjigantit teknologjik koreano-jugor. Han ishte 63 vjeç.
I lindur në vitin 1962, Han kishte qenë në krye të sektorit të elektronikës së konsumatorit dhe pajisjeve mobile të Samsung që nga viti 2022. Po atë vit, ai u emërua edhe zëvendëskryetar dhe CEO i kompanisë. Bashkë-CEO i tij, Jun Young-Hyun, u emërua javën e kaluar në këtë post dhe tashmë do të mbajë rolin e vetëm si drejtues i kompanisë pas vdekjes së Han. Në një mesazh të brendshëm që u sigurua nga CNN, Samsung i bëri homazhe Han Jong-Hee, duke theksuar se ai kishte kontribuar për më shumë se 37 vite në drejtimin e sektorit të televizorëve të kompanisë, duke e kthyer atë në një lider global. Si drejtues i degëve të elektronikës dhe pajisjeve shtëpiake, ai luajti një rol kyç edhe në rritjen e kompanisë në një kohë sfiduese për tregun.
“Ngushëllimet tona më të thella shkojnë për familjen dhe të afërmit e tij në këtë kohë të vështirë,” thuhej në mesazh.
Lexo edhe:“Pronar.al” – Startup-i shqiptar që po sfidon mënyrën tradicionale të shitjes së pronave
Samsung është përballur me sfida të mëdha gjatë viteve të fundit. Në sektorin e çipave logjikë, kompania ka mbetur pas në krahasim me liderin e industrisë, Taiwan Semiconductor Manufacturing Company (TSMC), si për sa i përket prodhimit të çipave më të avancuar, ashtu edhe në sigurimin e klientëve të mëdhenj. Në sektorin e çipave të memories – një fushë ku Samsung ka pasur gjithmonë avantazh – analistët thonë se kompania është lënë pas nga rivali korean, Hynix, sidomos në teknologjinë e memories me gjerësi të lartë bande (HBM), e cila është thelbësore për procesorët grafikë të kompanive si Nvidia.
Gjatë një takimi vjetor me investitorët javën e kaluar – që u drejtua nga Han – ai kërkoi ndjesë për performancën e aksioneve të Samsung dhe paralajmëroi për një vit 2025 të vështirë për shkak të pasigurive rreth politikave ekonomike të fuqive të mëdha. Ai shtoi se Samsung do të kërkojë marrëveshje “domethënëse” për bashkime dhe blerje këtë vit për të mbështetur rritjen e kompanisë.
“Ka vështirësi për të realizuar marrëveshje M&A në fushën e çipave për shkak të çështjeve rregullatore dhe interesave kombëtare, por ne jemi të vendosur të arrijmë rezultate konkrete këtë vit,” ishte shprehur ai.
Han iu bashkua kompanisë në vitin 1988, pasi përfundoi studimet bachelor në inxhinieri elektrike në Universitetin Inha. Përpara se të merrte drejtimin e sektorit të pajisjeve elektronike të Samsung, ai kishte qenë përgjegjës për operacionet në fushën e ekraneve.
Sipas një biografie të publikuar nga kompania javën e kaluar, Han ishte një figurë “qendrore” në lançimin e televizorëve LED të Samsung, një nga inovacionet që ndihmuan kompaninë të ruajë lidershipin teknologjik në treg.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
