Për herë të katërt në Shqipëri Rrjeti AS@N dhe Rrjeti Barazi në Vendimmarrje me mbështetjen e Schüler Helfen Leben në Gjermani dhe Rrjetit Europian të Organizatave Rinore – SAME organizon Ditën e Solidaritetit dhe Aktivizmit Social në Shqipëri gjatë datave 23-28 tetor 2023. Kjo nismë ka si objektiv të mbështesë të rinjtë për të ndërtuar së bashku një shoqëri që bazohet në solidaritet, pasi në fokus të nismës është promovimi i vullnetarizmit dhe angazhimi qytetar i të rinjve, si një mjet thelbësor për fuqizimin e të rinjve, për të zhvilluar aftësitë dhe kapacitetet e tyre, për të marrë pjesë në vendimmarrje dhe diskutime sociale dhe të bëhen agjentë të ndryshimeve sociale në komunitet.
Puna ka filluar, bizneset dhe të rinjtë që e mbështesin këtë nisëm janë gati për të kryer misionin e solidaritetit. Këtë vit nismës i janë bashkuar më shumë se 60 kompani në qarkun e Tiranës, Durrësit, Elbasanit, Lezhës, Fierit, Shkodrës dhe Korçës për të mirëpritur pranë tyre rreth 300 të rinj nga mosha 16-26 vjeç për Ditën e Solidaritetit dhe Aktivizmit Social.
Lexo edhe:“Dita e Solidaritetit dhe Aktivizmit Social” qindra kompani në ndihmë të studentëve
Për t’u përmenduar është fakti që shumë kompani që i janë bashkuar nismës kanë qenë mbështetëse të saj që vitin e parë dhe vazhdojnë të jenë edhe në vitin e katërt të saj si: Eurosig, Insig Jete, Insig, Vizion O.J.F, United Bank of Albania, Komiteti, CONAD, Deloitte, NDI Albania, Agna Group, Tirana International Hotel, AKH Consulting, DominuSoft, Univers Promotion, Ahmetaj Consulting, Xheko Imperial, ARSIS, Ceren Ismet Shehu, Balkans Capital, RYCO, Destil, si dhe shumë kompani të tjera, duke i ofruar të rinjve pjesë të nismës shumëllojshmëri mundësish për kryerjen e praktikës së punës. Nismës këtë vit i janë bashkuar dhe disa kompani të tjera, ku mund të përmendet: HAKO, Global Pro Group, SmartKids Albania, Helios Gastronomi, Prosound shpk, AlbAcademy, TIMAK Albania, New Media Communication, Bea Marketing & Promotions, Kopshti Sidita, CANCRI Marketing, etj.
Pjesë të nismës janë të rinj gjimnaziste dhe studentë të universiteteve publike dhe private, disa prej të cilëve janë veteranë të nismës që vitin e parë të saj. Ata janë shumë entuziastë që janë pjesë të nismës dhe e besojnë fort atë që dhe nisma ka si slogan dhe që e përshkruan shumë thjesht misionin e saj “Ndryshimi fillon nga ti!”.
Pas përfundimit të Ditës së Solidaritetit dhe Aktivizmit Social, Rrjeti AS@N dhe Rrjeti Barazi në Vendimmarrje do të hapë thirrjen për projekt propozime me në fokus të rinjtë, të cilat do të propozohen nga vetë të rinjtë që banojnë në qytetet ku nisma është pjesë. Më pas gjatë Asamblesë Kombëtare, e cila do të mbahet në dhjetor, të rinjtë pjesë të Ditës së Solidaritetit dhe Aktivizmit Social do të zgjedhin me votë nismën rinore të cilën duan ta mbështesin me kontributin e mbledhur gjatë Ditës së Solidaritetit dhe Aktivizmit Social.
Dita e Solidaritetit dhe Aktivizmit Social është krejtësisht një nisëm me në fokus të rinjtë dhe solidaritetin. Një nisëm me të rinjtë, nga të rinjtë dhe për të rinjtë.
Puna vazhdon drejt përmbushjes së misionit.
Shkroi: Manjola Topalli
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
