Microsoft ka njoftuar se duke nisur nga janari 2026, të gjithë punonjësit që jetojnë brenda një rrezeje prej 50 miljesh nga selia e kompanisë në Redmond do të detyrohen të punojnë nga zyra të paktën tre ditë në javë. Vendimi e vendos gjigantin e teknologjisë në të njëjtën linjë me kompani të tjera si Amazon, Google dhe Meta, të cilat kanë forcuar politikat e tyre mbi punën hibride dhe rikthimin fizik në ambiente pune.
Sipas raportimeve të Business Insider, disa ekipe mund të përballen edhe me kërkesa më të rrepta – katër ose pesë ditë në javë – në varësi të vendimeve të ekzekutivëve. Kompania pritet ta bëjë publik njoftimin në muajin shtator, duke i lënë punonjësve disa muaj kohë për t’u përshtatur me pritshmëritë e reja. Microsoft do të lejojë aplikime për përjashtime, por kriteret dhe procesi i miratimit mbeten ende të paqartë. Ky ndryshim paraqet një kthesë të fortë nga politika e fleksibilitetit gjatë pandemisë, kur punonjësit mund të kalonin deri në gjysmën e kohës së tyre të punës nga distanca pa miratimin e menaxherit. Madje, shumë prej tyre vijuan të punonin nga shtëpia edhe më shpesh, për shkak të interpretimit të lirë të politikave të brendshme.
Lexo edhe:ChatGPT gjeneron 2 miliardë dollarë të ardhura
Pjesë e valës së rikthimit në zyrë të Big Tech
Vendimi i Microsoft vjen në një moment kur kompanitë më të mëdha të teknologjisë po tërhiqen nga modeli i plotë i punës hibride. Amazon tashmë kërkon pesë ditë të plota në zyrë, ndërsa Google dhe Meta kanë përcaktuar tre ditë të detyrueshme. Sipas The Verge, ky ndryshim përkon me një periudhë të ndjeshme brenda kompanisë, pas valës së shkurtimeve që prekën rreth 15,000 punonjës këtë vit, pavarësisht se Microsoft raportoi 27 miliardë dollarë fitime tremujore. Kjo ka bërë që shumë analistë dhe vetë punonjësit ta shohin masën si një formë “shkarkimi të fshehtë”, duke i shtyrë të largohen ata që nuk janë të gatshëm të përmbushin kërkesat e reja. Ky vendim krijon gjithashtu një kontradiktë të dukshme: Microsoft prej vitesh promovon zgjidhje softuerike që mundësojnë bashkëpunimin në distancë dhe ka qenë një prej mbështetësve kryesorë të modelit hibrid të punës si mënyrë për të rritur produktivitetin dhe për të mbajtur të motivuar stafin.
Përtej aspektit kulturor, zbatimi i planit pritet të përballet me sfida logjistike. Burime të brendshme raportojnë se hapësirat në kampusin e Microsoft janë të kufizuara, me mungesë dhomash takimi, problematika energjie dhe infrastrukturë të pamjaftueshme – pavarësisht një investimi prej 5 miliardë dollarësh për zgjerimin e tij.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
