Mësonjëtorja Virtuale ofron mësim falas për nxënësit e diasporës shqiptare

Në periudhën e shpërthimit të pandemisë së koronavirusit, institucionet arsimore mbyllën dyert dhe procesi i mësimdhënies vazhdoi online.

Për të lehtësuar këtë proces, një grup ekspertësh shqiptarësh në diasporë, mes tyre programues, inxhinierë, jurist, mjekë dhe biznesmenë, lançuan platformën “Mësonjëtorja Virtuale, Mëso Shqip”. Themeluesi kryesor i saj është Bledar Balla, i cili së bashku me grupin e lartpërmendur kanë investuar profesionalisht dhe financiarisht, për funksionimin e saj. Në një intervistë për BusinessMag, Bledar Balla na tregon më shumë për Mësonjëtoren dhe ecurinë e saj.

“Mesonjëtorja Virtuale, Mëso Shqip”, është një portal i ndërtuar për t’i ardhur në ndihmë mësuesve që të mund të krijojnë klasat virtuale me nxënës të diasporës shqiptare, por dhe me nxënës të huaj që dëshirojnë të mësojnë gjuhën shqipe.

Portali ofrohet pa pagesë për mësuesit në diasporë si një mjet për të arritur tek nxënësit e tyre duke kapërcyer të gjitha barrierat fizike, të kohës dhe problemet sociale. “Interesi për mësimin e gjuhës shqipe është në rritje dhe kjo është një e dhënë që na bën të ndihemi krenarë për punën e kujtdo, që investon kohë dhe energji në këtë proces”, na thotë Bledari.

Platforma u themelua para një viti për mesimin e gjuhës shqipe nga femijët shqiptarë në emigracion. Por në kushtet e pandemisë së COVID-19, administratorët e saj vendosën ta ofrojnë shërbimin e portalit pa pagesë për të gjithë mësuesit, që organizojnë klasa virtuale, në mënyrë që mësimdhënia të vazhdonte si proces.

Lexoni: ZERI.app, aplikacioni që ju kthen tekstet në audio

Mësonjëtorja Virtuale ofron të gjitha lehtësirat e nevojshme për të organizuar një orë mësimi, por edhe për të kontrolluar nxënësit në kohë reale. Mësuesit mund të shpjegojnë mësim, përmes dërrasës së zezë virtuale. Nga ana tjetër mund të regjistrojnë mungesat, të kryejnë teste dhe të vlerësojnë nxënësit e tyre.

Komunikimi live është i rëndësishëm në procesin e nxënies. Pikërisht këtë synon edhe kjo platformë duke ofruar komunikim mes nxënësve dhe mësuesve, përmes kamerës, pa një limit kohor, i cili mund t’i penalizojë.

Mësonjëtorja ofron mundësinë që nën sloganin “Mëso Shqip”, çdo shkollë dhe institucion mësimdhënieje të krijojë ambientin virtual për të zhvilluar procesin mësimor.

“Në javën e parë të lançimit të platformës kishim gati 200 nxënës të rregjistruar dhe rreth 60-70 mësues, të profileve te ndryshme, por numri i përdoruesve ka ardhur në rritje. Mes përdoruesve të platformës ka pasur edhe OJF ndërkombëtare”, thotë Bledar Balla.

Sistemi është i automatizuar dhe drejtohet nga mësuesi i lëndës, i cili krijon klasat e veta në bazë të programit mesimor dhe fton nxënësit, t’i bashkohen. Të dhënat e mësuesve dhe nxënësve janë të sigurta dhe nuk bëhen publike. “Ne ndërhyjmë vetëm nëse na kërkohet asistencë teknike, duke pasur të hapura kurse trajnimi thuajse 24 orëshe”, shton më tej themeluesi i saj.

Mësuesit janë vullnetarë dhe procesin e mësimdhënies e zhvillojnë për patriotizëm, si detyrim moral, që rrjedh nga dashuria për motrat dhe vëllezërit, mbesat dhe nipërit, që kemi larg.Është e rëndësishme që fëmijët të njohin gjuhën, historinë dhe gjeografinë e prejardhjes.

Gjatë intervistës, administratorët ndanë me ne edhe një shqetësim të tyre përsa i përket mungesës së mbështetjes.

“Ajo që na shqetëson është muri i indiferencës i organeve të zgjedhura ekzekutive.  Ne trokitëm në dyert e shtetit, por nuk arritëm të merrnim mbështetje”, na thotë Bledari në mbyllje të intervistës.

Për të vizituar websiten e platformës mund të klikoni këtu.