Mbi 800 kWh, energjia do të kushtojë mbi 4 herë më shumë - Business Magazine Albania

Mbi 800 kWh, energjia do të kushtojë mbi 4 herë më shumë

energjia

Nga 1 tetori, familjet që shpenzojnë mbi 800 kv/orë energji në muaj do të duhet të paguajnë me çmimet e tregut.

Ministrja e Energjisë dhe Infrastrukturës, Belinda Balluku tha në konferencën për shtyp se çmimi i energjisë do të rritet në 42 lekë, çmimi i sotshëm i tregut, për të gjitha familjet që shpenzojnë mbi 800 kWh, nga 9.5 lekë, që është sot tarifa për gjithë sasinë e energjisë së konsumuar, apo 4.4 herë më shumë. Çmimi i tregut ndryshon dhe nëse energjia në bursa shtrenjtohet më shumë në dimër, mund të jetë edhe më lart.

Ky vendim do të jetë në fuqi deri në 31 dhjetor të këtij viti.

Sipas ministres së Energjisë dhe Infrastrukturës, ky vendim prek vetëm 4% të abonentëve familje, pasi 96% e tyre harxhojnë më pak se 800 kv/orë energji elektrike.

Me këtë plan, qeveria ka një plan të kursejë 100 milion lekë. Administratori i energjisë në zyra dhe institucione. Një person, që me siguri duhet të jetë kursimtar, do të caktohet në çdo zyrë dhe institucion publik dhe detyra e tij do të jetë përmbushja e qëllimit të qeverisë, për të ulur me 5% konsumin mujor.

Ministrja Balluku tha se qytetarët duhet të ndërgjegjësohen për kursimin e energjisë. Ajo vetë, ekspertë dhe grupe pune nga OSHEE do të zhvillojnë disa takime nëpër shkollat e vendit, duke nisur nga data 14 shtator. Edukimi për kursimin e energjisë është shumë i rëndësishëm, u shpreh Balluku.

Duke kujtuar masat drastike të marra nga vendet perëndimore për menaxhimin e krizës energjetike, kryeministri Edi Rama kërkoi ndërgjegjësim, ndërsa tha se “familjarët s’kanë pse të paguajmë për kostot e miliarderëve me pishina dhe vila:

“Kemi mbi 90% konsumatorë familjarë, të cilët konsumojnë rregullisht më pak se 800 kv/h dhe kemi një numër konsumatorësh rreth 6-7% të totalit që konsumojnë më shumë se 800 kv dhe aty bëhet fjalë për konsumatorë familjarë me vila, me pishina, me oborre të gjera, me ndriçim dekorativ e kështu me radhë për të cilët mendojmë se ka ardhur koha që nuk mund të paguajë më buxheti i shtetit dhe nuk mund të paguajnë më taksapaguesit e zakonshëm, prandaj çdo kilovat mbi 800-in do të paguhet me çmimin e tregut dhe me këtë ne synojmë edhe të krijojmë një presion për të ulur konsumin e tepërt të energjisë elektrike në kushte krize”.

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #30 - Nëntor 2022
Shiko më shumë
Na ndiqni në rrjetet sociale
0