Pas Shqipërisë, edhe Mali i Zi duket se po përballet me një sulm masiv kibernetik. Associated Press raporton se një ekip ekspertësh kibernetikë të FBI-së është nisur drejt Malit të Zi, për të hetuar një sulm masiv dhe të koordinuar ndaj qeverisë së vendit të vogël ballkanik. Lajmi u bë i ditur nga Ministria e Punëve të Brendshme malazeze.
Njoftimi për sulm masiv erdhi pasi faqet kryesore të internetit të qeverisë – përfshirë Ministrinë e Mbrojtjes, Ministrinë e Financave dhe Ministrinë e Brendshme – mbetën të bllokuara. Zyrtarët thanë se linjat u ndërprenë “për arsye sigurie”. Ministria e quajti ndihmën e FBI-së “një konfirmim tjetër të bashkëpunimit të shkëlqyer mes Shteteve të Bashkuara të Amerikës dhe Malit të Zi, si dhe një dëshmi se Mali i Zi mund të llogarisi mbështetjen amerikane në çdo situatë”.
Agjencia e Malit të Zi për Sigurinë Kombëtare fajësoi Rusinë për sulmin, i cili filloi në fund të javës së kaluar, por pa dhënë prova. Një kombinim i ransomware dhe sulmeve të shpërndara të bllokimit të shërbimeve, ndërprenë shërbimet qeveritare. Kjo bëri që kompania elektrike që merret me mirëmbajtjen të kalonte në kontrollin manual.
Një bandë zhvatëse kriminale kibernetike mori përgjegjësinë për të paktën një pjesë të sulmit, duke infektuar një zyrë parlamentare me ransomware të njohur si Kuba, për të cilin firma e sigurisë kibernetike Profero ka zbuluar se janë persona që flasin rusisht. Kriminelët kibernetikë që flasin rusisht në përgjithësi veprojnë pa ndërhyrjen e Kremlinit, për sa kohë që ata nuk synojnë kombet mike.
Zyrtarët thanë se nuk është bërë asnjë kërkesë për shpërblim. Zyrtarët malazezë thanë se Rusia ka një motiv të fortë për një sulm të tillë, sepse shteti ballkanik, i konsideruar dikur një aleat i fortë rus, iu bashkua NATO-s në vitin 2017, pavarësisht kundërshtimit të fortë nga Kremlini. Ajo gjithashtu i është bashkuar sanksioneve perëndimore kundër Moskës për shkak të pushtimit të Ukrainës në shkurt.
Të premten, Ambasada e SHBA-së në Podgoricë lëshoi një alarm të rrallë, duke thënë se sulmi mund të përfshijë” ndërprerje në shërbimet publike, transportin (përfshirë pikat kufitare dhe aeroportin) si dhe sektorët e telekomunikacionit.
Shtetet e tjera të Europës Lindore që konsiderohen si armiq të Rusisë kanë pësuar kohët e fundit gjithashtu sulme kibernetike, kryesisht fushata të mohimit të shërbimit, të cilat i bëjnë faqet e internetit të paarritshme duke i përmbytur ato me të dhëna të padëshiruara, por që nuk i dëmtojnë të dhënat. Objektivat kanë përfshirë rrjete në Moldavi, Slloveni, Bullgari dhe Shqipëri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
