Lotaria fiskale e kuponave, të paktën 50 kupona me vlerë minimale totale 5 mijë lekë


Të gjithë qytetarët, që kanë kryer blerje të ndryshme duke tërhequr kuponin tatimor, nga data 15 nëntor e deri në ditën e fundit të këtij viti, mund të bëhen pjesë e lotarisë së parë fiskale në vend.

“Të gjithë kuponat tatimorë të kësaj periudhe, personat që duan të jenë pjesë e lojës duhet t’i mbledhin dhe t’i dërgojnë me zarf përmes Postës nga data 1 janar deri më 11 janar. Mbi zarf duhet shënuar nga vet individi që do të marrë pjesë në këtë lojë, numri total i kuponave brenda zarfit dhe vlera nominale totale e tyre”, tha Geraldina Prodani, sekretare e Përgjithshme e Ministrisë së Financave.

Mbi zarfet, që do të dërgohen përmes Postës, qytetarët do të shkruajnë adresën për lojën promocionale te shtëpia e letrave me vlerë. Por, pjesëmarrja ka një kufizim.

“Në zarf nuk mund të ketë më pak se 50 kupona dhe vlera nominale e tyre nuk mund të jetë më e vogël se 5000 lekë. Nuk ka kufizime në vlerën e kuponit, sepse jemi të interesuar të kapim çdo lloj kuponi, duke filluar nga ai 50 lekësh i kafes e deri te të mëdhatë”, tha Geraldina Prodani.

Lotaria fiskale do të ketë mbi 500 çmime fituese, të ndara në dy grupe, si çmime të mëdha dhe ato më të vogla. Për grupin e parë, fituesit do të përcaktohen sipas një formule, që bazohet te vlera e kuponave në zarf dhe numri i tyre.

“70 për qind e pikëve merren nga vlera e kuponave në zarf dhe 30 për qind nga numri i tyre. Në bazë të këtij vlerësimi pikësor do të bëhet edhe kategorizimi për çmimet. Çmimi i madh është mbi një milion lekë, që ndiqet nga 10 çmime pasuese me nga 100 mijë lekë”, tha më tej Geraldina Prodani.

Grupi i dytë, ai i çmimeve të vogla, do të shpallet nga sistemi kompjuterik i Tatimeve, i cili përzgjedh automatikisht dhe në mënyrë rastësore “bar kodin” e zarfeve. Në këtë grup ka 200 çmime me vlerë 15 mijë lekë dhe 300 të tilla me vlerë 10 mijë lekë.

“Ka shumë pyetje, njerëzit pyesin nëse është më mirë të konkurrosh me një zarf apo me disa të tillë. E para të jep më shumë mundësi për çmimin e madh, e dyta për çmimet e vogla. Ndaj është zgjedhje personale e gjithkujt”, deklaroi Geraldina Prodani.

Shorti për lotarinë do të hidhet në datën 15 janar. Shorti i parë do të shërbejë si test, ndërkohë që ministria thotë se, lotaria do të vazhdojë edhe më pas, por me një formulë që mbetet ende për t’u përcaktuar.

/Top-Channel/

Must watch
Business Mag Nr. #24 - Tetor 2020

Numri 24 i revistës Businessmag.al sjell një panoramë të zhvillimeve, përshtatjeve dhe ecurisë në sektorë të ndryshëm të ekonomisë. Në të njëjtën kohë, shohim zhvillime relativisht të kënaqshme.  Organizime të reja si Dhoma Ekonomike e Gruas, duket si një shpresë për më shumë zë, lobim dhe mbështetje për gratë sipërmarrëse dhe sipërmarrjet e reja.

Gjatë kësaj periudhe angazhime si programi “Ringrihu më i fortë”, ishin një lloj kundërpërgjigje ndaj dëmeve ekonomike që po shkakton pandemia.

Influencerat vijojnë të rrisin hapësirat e tyre dhe janë bërë një instrument i rëndësishëm marketimi. Në brendësi të revistës do të gjeni renditjen e top 100 influencerave më të mëdhenj në vend.

Gjatë kësaj vere ndërkohë, vetë Businessmag pati një fushatë të suksesshme të promovimit të turizmit shqiptar. Qindra të rinj u angazhuan të dërgojnë foto dhe përshkrimet e vendeve të ndryshme të Shqipërisë.

Shiko më shumë
Na ndiqni në rrjetet sociale