Të vetëpunësuarit në profesionet e lira do të taksohen njëlloj si të punësuarit. Ndryshimet ligjore që shënjestrojnë këtë kategori do të prezantohen në fillim të muajit të ardhshëm. Nisma e qeverisë për përfshirjen e profesionistëve të lirë në sistemin e tatimit mbi të ardhurat personale vjen pas rekomandimeve të herëpashershme të Fondit Monetar Ndërkombëtar dhe Bankës Botërore për të shmangur përjashtimet tatimore pasi krijojnë pabarazi dhe gropa në buxhet.
“Nga data 1 qershor ne do t paraqesim ligjin e ri të Tatimit mbi të Ardhurat që do të targetojë profesionet e lira, të cilat sot individët çelin biznese, ia shesin bizneseve të tjera si shërbime duke eliminuar pagesën e taksave. Kjo, nga hyrja në fuqi e ligjit që do prezantohet së shpejti nuk do të jetë më e mundur.” – u shpreh Delina Ibrahimaj.
Qeveria paralajmëroi ashpërsim të masave me dyfishim të gjobave pas informalitetit të madh që u konstatua me mosdeklarimin e pagave, mangësi në kontratat e punës, mospagesat kundrejt orëve shtesë, si dhe mosdeklarim i punonjësve sidomos në ndërtim dhe tregti,shkelje të konstatuar nga njësia anti informalitet. Së shpejti, verifikime do të bëhen dhe për nivelin e pagës së deklaruar dhe stilit të jetesës.
“Ne do të shkojmë më tutje në ballafaqimin e pagave të deklaruara me stilin e jetesës. Kjo vlen sidomos për ata që marrin paga të larta dhe që i shmangen deklarimeve në mënyra të ndryshme. Ne do të ecim me kontrollet që do të synojnë gjetjen e boshllëqeve midis deklarimit të të ardhurave dhe stilit të jetës. Mund të deklarosh të ardhura X dhe të kesh shtëpia edhe vetura që nuk bëhen kurrë me ato të ardhura.” – u shpreh kryeministri Rama
“Do të bëjmë disa ndryshime në ligj dhe për të gjitha shkeljet që përbëjnë evazion do të ketë gjoba 200% dhe do dyfishojmë gjobat për mosdeklarimin e pagave dhe fshehjen e pagës. Nuk do të jetë më mundësia e dhënies së rekomandimit të biznesit, por automatikisht në penalitete.” – u shpreh Delina Ibrahimaj, Ministre e Fiancave dhe Ekonomisë.
Ndër të tjera, kryeministri Edi Rama hodhi idenë e bërjes publike të pagave një herë në vit duke pyetur qytetarët në Këshillimin e Ardhshëm Kombëtar, pasi sipas tij publikimi i listëpagesave mund të ndikojë pozitivisht në vetërregullimin nga bizneset.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
