Shumë njerëz bëhen sipërmarrës për arsye nga më të ndryshmet, sepse nuk e duronin shefin, kishin një ide gjeniale, apo thjesht donin të kujtonin vetes dhe të tjerëve se jeta është e bukur. Kështu ndodhi edhe me Bert dhe John Jacobs, dy vëllezër amerikanë që nuk trashëguan pasuri, por një shpirt të pathyeshëm dhe një filozofi që u kthye në brand.
Një fëmijëri modeste dhe një natë që ndryshoi gjithçka
Dy më të vegjlit nga gjashtë fëmijë, Bert dhe John u rritën në një shtëpi të vogël në periferi të Bostonit. Babai punonte si zejtar, ndërsa nëna, e palodhur dhe plot optimizëm, mbante familjen të bashkuar edhe në ditët më të vështira. Por një aksident tragjik automobilistik e la babain të paaftë për të punuar dhe e zhytën atë në një depresion të thellë.
Në atë errësirë emocionale, nëna e tyre bëri diçka të jashtëzakonshme, çdo mbrëmje, gjatë darkës, ajo pyeste: “Më thoni diçka të mirë që ndodhi sot.” Ajo pyetje e thjeshtë ndryshonte atmosferën. Qeshjet riktheheshin. Dhe fëmijët mësonin një mësim të çmuar, pozitiviteti është zgjedhje.
Një ide e çmendur dhe një bast 200-dollarësh
Pas universitetit, dy vëllezërit nuk kishin ndërmend të ndiqnin rrugët klasike të karrierës. Donin të krijonin diçka që do të kishte kuptim. Gjatë një udhëtimi me makinë nëpër Shtetet e Bashkuara, ata menduan: Po sikur të shisnim bluza?
Morën borxh 200 dollarë nga vëllai i madh, blenë një tavolinë palosëse dhe nisën të shisnin bluza në universitete. Shisnin mjaftueshëm për të mbijetuar. Blenë një minivan të përdorur dhe për pesë vjet udhëtuan nëpër vend, flinin në makinë dhe shisnin bluza në rrugë dhe panaire.
Kur po afronin të tridhjetat, kishin vetëm 78 dollarë në xhep. Dhe pikërisht atëherë ndodhi kthesa e madhe.
“Life is Good”, tre fjalë që prekin zemrat
Në një nga kthimet për në Boston, u ndalën të flasin për atë që i shqetësonte, lajmet ishin plot frikë, ndarje dhe negativitet. Po ku mbetën gjërat e mira?
U kujtuan për mësimin e nënës. Atë natë, vizatuan një figurë të thjeshtë, një njeri me beret dhe buzëqeshje qesharake dhe poshtë tij shkruan tre fjalë, Life is Good. Me 78 dollarët e fundit shtypën 48 bluza dhe i morën në një panair në Cambridge.
Shitën gjithçka për 45 minuta.
Pas pesë vitesh përpjekjesh pa rezultat, gjetën më në fund mesazhin që preku njerëzit. Dhe nuk ishte thjesht dizajni, ishte historia, optimizmi, shpresa.
Nga minivani në mbi 30 shtete dhe 4,500 dyqane
Sot, “Life is Good” është një markë ndërkombëtare që shitet në 4,500 dyqane në 50 shtete të SHBA-së dhe në 30 vende të tjera. Por në thelb, ajo mbetet po ajo, një kujtesë e përditshme se pavarësisht vështirësive, gjithmonë ka diçka të mirë.
Dhe kjo është ajo çfarë Bert dhe John kanë ndarë me botën, një filozofi të thjeshtë që ndryshon mënyrën si e sheh jetën.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
