Në Ditën Ndërkombëtare të Gruas, më 8 mars, një listë e re vë në qendër të vëmendjes gratë që po formësojnë të ardhmen e inovacionit në Europë. Publikimi i listës së 100 grave më me ndikim në ekosistemin europian të startup-eve dhe kapitalit sipërmarrës për vitin 2026 vjen në një moment kur diskutimi për barazinë gjinore në teknologji dhe sipërmarrje është më i fortë se kurrë.
Tema e këtij viti për Ditën Ndërkombëtare të Gruas, “Give to Gain” (Jep për të Fituar), thekson rëndësinë e bashkëpunimit, bujarisë dhe përgjegjësisë së përbashkët për të përshpejtuar progresin drejt barazisë. Fushata u bën thirrje individëve, organizatave dhe komuniteteve të kontribuojnë përmes mentorimit, edukimit, financimit dhe krijimit të rrjeteve mbështetëse për gratë në biznes dhe teknologji.
Ideja është e thjeshtë: kur mundësitë ndahen dhe mbështetja ofrohet në mënyrë aktive, progresi përshpejtohet. Përkrahja e grave në sipërmarrje, teknologji dhe kapital sipërmarrës nuk është një proces ku dikush humbet që dikush tjetër të fitojë. Përkundrazi, kur gratë arrijnë sukses, i gjithë ekosistemi i inovacionit bëhet më i fortë dhe më konkurrues.
Në të gjithë Europën, një numër gjithnjë e më i madh grash po udhëheqin kompani teknologjike, po investojnë në startup-e të reja dhe po mentorojnë brezin e ardhshëm të sipërmarrësve. Roli i tyre është bërë thelbësor për zhvillimin e ekosistemit të inovacionit dhe për forcimin e pozicionit të Europës si një nga qendrat globale të teknologjisë dhe sipërmarrjes.
Lista e këtij viti përfshin lidere nga fusha të ndryshme, nga inteligjenca artificiale dhe teknologjitë e thella (deep tech), te energjia e gjelbër, fintech, apo shëndeti digjital. Ajo përfshin themeluese startup-esh, investitore të kapitalit sipërmarrës, drejtues fondesh investimi dhe eksperte që ndikojnë në politikat e inovacionit në nivel europian.
Mes emrave të përfshirë në listë është Agate Freimane, partnere e përgjithshme në Norrsken VC, një fond investimi i fokusuar në startup-e me ndikim social dhe mjedisor. Ajo konsiderohet një nga figurat më të rëndësishme në investimet me ndikim në Europë dhe ka punuar më parë në sektorin financiar në Londër dhe Nju Jork.
Një tjetër emër i spikatur është Alice Albizzati, partnere themeluese e Revaia, një fond investimesh me bazë në Paris që mbështet kompani europiane me rritje të qëndrueshme. Gjatë karrierës së saj ajo ka qenë e përfshirë në financimin dhe zhvillimin e më shumë se 35 kompanive në faza të ndryshme të rritjes.
Në listë përfshihet edhe Alice Pelton, CEO dhe bashkëthemeluese e platformës The Lowdown, e cila konsiderohet platforma e parë globale për vlerësimin e kontraceptivëve dhe informacionin mbi shëndetin riprodhues të grave. Platforma përdoret nga mijëra gra çdo ditë për të marrë vendime të informuara mbi shëndetin e tyre.
Ndërkohë, Aline Vedder drejton diplomacinë teknologjike në Konsullatën e Përgjithshme Britanike në Mynih, ku koordinon iniciativa strategjike për bashkëpunim mes Mbretërisë së Bashkuar dhe Gjermanisë në fusha si Inteligjenca Artificiale, siguria kibernetike dhe teknologjitë kritike.
Lista përfshin gjithashtu Alisée de Tonnac, themeluese e Seedstars, një organizatë globale që mbështet startup-e me rritje të shpejtë në tregjet në zhvillim përmes investimeve dhe programeve për ndërtimin e ekosistemeve sipërmarrëse.
Në sektorin e energjisë së gjelbër, spikat Carlota Pi Amoros, bashkëthemeluese dhe CEO e kompanisë Holaluz, e cila po përshpejton tranzicionin drejt energjisë 100% të rinovueshme përmes zgjidhjeve të shpërndara energjetike dhe teknologjisë digjitale.
Lexo edhe: 3 milionë euro për startup-et! Lançohet zyrtarisht thirrja “Grant 26”
Ndër emrat më të njohur është edhe Cristina Fonseca, partnere e përgjithshme në Indico Capital Partners dhe bashkëthemeluese e unicorn-it portugez Talkdesk, e cila sot investon në startup-e të inteligjencës artificiale, SaaS dhe deep tech në Europë.
Lista përfshin gjithashtu sipërmarrëse që po ndryshojnë sektorin e shëndetit dhe mirëqenies. Danila De Stefano, themeluese e platformës së shëndetit mendor Unobravo, e cila ka ndërtuar një shërbim digjital që operon në disa vende europiane dhe ka ofruar miliona seanca terapeutike për përdoruesit.
Një figurë tjetër e njohur është edhe ish-kampionia olimpike Jessica Ennis-Hill, e cila ka hyrë në botën e sipërmarrjes duke themeluar startup-in femtech Jennis, që synon të ndihmojë gratë të kuptojnë më mirë ciklin hormonal dhe ndikimin e tij në shëndetin dhe performancën fizike.
Megjithatë, autorët e listës theksojnë se 100 emra përfaqësojnë vetëm një pjesë të vogël të grave që po ndikojnë realisht në inovacionin europian. Në të gjithë kontinentin ka shumë më tepër themeluese, investitore dhe lidere teknologjie që po kontribuojnë në zhvillimin e startup-eve dhe të ekonomisë digjitale.
Në një kohë kur ekosistemi i startup-eve po bëhet gjithnjë e më global dhe konkurrues, roli i grave në teknologji dhe sipërmarrje po bëhet gjithnjë e më i rëndësishëm. Sipas organizatorëve të listës, ndarja e mundësive, njohurive dhe kapitalit është çelësi për të ndërtuar një ekosistem më gjithëpërfshirës dhe më të fortë inovacioni në Europë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
