Ndalimi i përdorimit të rrjeteve sociale për fëmijët nën 16 vjeç në Australi ka tërhequr vëmendjen globale, dhe qeveritë në mbarë botën po shqyrtojnë miratimin e politikave të ngjashme. Në këtë kontekst, Mbretëria e Bashkuar shihet si vendi më i mundshëm që mund të veprojë i radhës.
Ligji australian “Online Safety Amendment Act” hyri në fuqi më 10 dhjetor dhe përfshiu platformat kryesore të mediave sociale, përfshirë Reddit, X, Instagram (Meta), YouTube (Google) dhe TikTok (ByteDance). Sipas ligjit të ri, platformat janë të detyruara të zbatojnë metoda të verifikimit të moshës për të parandaluar që fëmijët nën 16 vjeç të hapin llogari. Kompanitë që nuk respektojnë rregullat mund të përballen me gjoba deri në 49.5 milionë dollarë australianë (rreth 32 milionë dollarë amerikanë). Reagimet ndaj ndalimit kanë qenë të përziera: disa e mbështesin si masë mbrojtëse për shëndetin mendor të fëmijëve, ndërsa të tjerë e konsiderojnë kufizim të lirisë digjitale.
Megjithatë, shumë vende po përgatisin legjislacione të ngjashme. “Kjo është një çështje globale dhe qeveritë kudo janë nën presion për të vepruar,” tha Daisy Greenwell, bashkëthemeluese e fushatës britanike Smartphone Free Childhood (SFC), e cila kërkon që prindërit të vonojnë dhënien e telefonave inteligjentë dhe aksesit në rrjete sociale për fëmijët.
Ajo shtoi: “Askush nuk beson më se situata aktuale po funksionon për fëmijët, prindërit apo shoqërinë. Ky ndalim është një nga përgjigjet më konkrete politike deri tani.”
Lexo edhe: Klubi i librit “Bytes & Books” diskutim për “Brezi i Ankthit”
Kush po e shqyrton ndalimin?
Përveç Mbretërisë së Bashkuar, vende të tjera që po diskutojnë një ndalim për nën 16-vjeçarët përfshijnë:
- Francën
- Danimarkën
- Spanjën
- Gjermaninë
- Italinë
- Greqinë
Në SHBA, një ndalim kombëtar duket më pak i mundshëm, por disa shtete si Kalifornia dhe Teksasi po përgatisin ligje të ngjashme në nivel lokal për vitin 2026.
Mbretëria e Bashkuar drejt votimit
Në Mbretërinë e Bashkuar, debati është intensifikuar. Dhoma e Lordëve pritet të votojë këtë javë për një amendament që do të përfshijë ndalimin e rrjeteve sociale për nën 16-vjeçarët në kuadër të ligjit për mirëqenien e fëmijëve. Fushata SFC ka mobilizuar prindër dhe qytetarë, duke dërguar mbi 100,000 email-e tek ligjvënësit britanikë për të kërkuar masa më të forta mbrojtëse për fëmijët. Kryeministri britanik Keir Starmer ka shprehur mbështetje për idenë, duke thënë se është thelbësore të mbrohen fëmijët nga ndikimet negative të rrjeteve sociale dhe përdorimit të tepruar të ekraneve, veçanërisht për fëmijët nën pesë vjeç.
Çfarë thonë ekspertët?
Studiuesit dhe psikologët paralajmërojnë se përdorimi i tepruar i rrjeteve sociale lidhet me rritje të ankthit, depresionit dhe problemeve të vetëvlerësimit tek adoleshentët Autori i librit “The Anxious Generation”, Jonathan Haidt, ka argumentuar se kufizimi i rrjeteve sociale mund të ndryshojë normat shoqërore, duke ulur presionin mbi adoleshentët për të qenë vazhdimisht online.
Siç thekson Ravi Iyer nga Universiteti i Kalifornisë Jugore: “Nëse shumica e adoleshentëve nuk janë më në rrjete sociale, atëherë presioni social për të qenë prezent zhduket – dhe kjo mund të ketë efekte pozitive të mëdha për shëndetin mendor.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
