Kriza e automjeteve në Evropë godet Bosch, shkurtohen 13 mijë punonjës

Gjiganti gjerman i inxhinierisë Bosch ka njoftuar se do të shkurtojë rreth 13,000 vende pune në njësinë e prodhimit të pjesëve për automjete deri në vitin 2030, çka përfaqëson rreth 3% të fuqisë punëtore globale të kompanisë.

Shkurtimet do të prekin kryesisht fabrikat në Gjermani, me bazën në rajonin e Stuttgart-ut që do të goditet më fort. Një numër i madh punonjësish pritet të preken edhe në zonat e Feuerbach dhe Schwieberdingen.

Sipas kompanisë, masa synon të kursejë 2.5 miliardë euro “sa më shpejt të jetë e mundur”, pasi kriza në industrinë evropiane të automjeteve po thellohet. Bosch do të nisë menjëherë diskutimet me punonjësit e prekur.

Sfidat e tregut të automjeteve
Prodhuesit evropianë të makinave po vuajnë nga një kombinim faktorësh: kërkesë e dobët, kosto të larta të energjisë dhe punës, konkurrencë e ashpër nga modelet më të lira kineze dhe presioni nga tarifat amerikane për makinat dhe pjesët e këmbimit. Aktualisht, tarifa për eksportet në SHBA është në nivelin 15%, më e ulët se norma e kërcënuar prej 27.5%.

Lexo edhe: Nga Shqipëria në SHBA, rrefimi i Mea Matës për marketingun dhe brand-et globale

Ndërkohë, kalimi drejt automjeteve elektrike shton pasiguri, pasi disa qeveri evropiane kanë reduktuar subvencionet për konsumatorët, duke frenuar kërkesën.

Bosch nuk është i vetmi prodhues që shkurton vende pune: Volkswagen, Volvo, Nissan dhe Stellantis kanë ndërmarrë hapa të ngjashëm këtë vit. Krahas uljes së fuqisë punëtore, kompania ka paralajmëruar se do të reduktojë investimet në kapacitetet e prodhimit për shkak të rënies së kërkesës.

Ky vendim është një goditje për kancelarin gjerman Friedrich Merz, i cili përpiqet të rikthejë vitalitetin e sektorit industrial me plane për më shumë shpenzime publike. Pavarësisht kësaj, ekonomia gjermane pritet të rritet vetëm me 0.2% këtë vit, pas dy viteve recesioni, ndërsa ekspertët paralajmërojnë se situata mbetet e brishtë.