Një startup britanik ka prezantuar krahun e parë bionik wireless në botë, i cili funksionon edhe kur nuk është i lidhur me trupin e përdoruesit.
Open Bionics, me qendër në Bristol, ka kaluar katër vite duke zhvilluar modelin më të fundit të krahut bionik Hero, që tashmë konsiderohet si gjymtyra robotike më e avancuar në botë.
“Është dy herë më i shpejtë dhe dy herë më i fuqishëm se duart bionike aktuale në treg, ndërsa mbetet edhe dora më e lehtë e disponueshme dhe e para që është plotësisht e papërshkueshme nga uji dhe tërësisht pa tela,” – u shpreh Samantha Payne, bashkëthemeluese dhe CEO e Open Bionics, për gazetën The Independent. “Është një hap gjigant për industrinë dhe na ka gëzuar jashtëzakonisht reagimi pozitiv nga mjekët dhe vetë pacientët. Është si një teknologji që vjen nga filmat fantastiko-shkencorë.” Pajisja përdor elektroda EMG wireless të quajtura MyoPods, që vendosen mbi krahun e përdoruesit dhe lexojnë sinjalet muskulore. Këto sinjale i japin komandë gishtërinjve të dorës bionike për të lëvizur.
Tilly Lockey, një vajzë 19-vjeçare që humbi të dyja duart si fëmijë nga meningiti, ka qenë përdoruese e krahëve bionikë të zhvilluar nga Open Bionics për nëntë vitet e fundit. Përvoja dhe sugjerimet e saj kanë ndihmuar në zhvillimin e modelit më të ri, që ajo e cilëson të pakrahasueshëm përsa i përket funksionalitetit dhe teknologjisë.
“Edhe pse e dija që teknologjia e re do të ishte e mirë, nuk e prisja që do të mbetesha pa fjalë nga niveli i përparimit,” – tha ajo.
“Duart janë shumë më të fuqishme. Mund ta heq vetë dorën time dhe ta bëj të ecë mbi tavolinë dhe të kthehet tek unë, vetëm duke përdorur sensorët pa tela që ndodhen në lidhësen time. Nuk mund ta imagjinoni sa epike është kjo teknologji.”
Që prej krijimit në vitin 2014, Open Bionics ka ndihmuar mbi 1,000 persona, duke përdorur skanime 3D dhe printim 3D për të krijuar krahë bionikë të personalizuar për njerëz me amputime. Modeli më i fundit lejon përdoruesit të ndërrojnë dorën me pajisje të tjera, duke iu dhënë mundësinë të përshtaten me aktivitete të ndryshme me lehtësi.
“Tani kam rrotullim 360 gradë në kyçin e dorës dhe mund ta përkul atë gjithashtu. Nuk ka asnjë dorë tjetër që bën këtë,” – shtoi Tilly. “Asnjë dorë tjetër nuk është pa tela dhe e papërshkueshme nga uji, dhe kjo është më e shpejta nga të gjitha, ndërkohë që mbetet më e lehta në peshë. Nuk e di si e kanë arritur këtë. Jam më e fortë se kurrë më parë.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
