Tesla publikoi këtë të mërkurë të dhënat për tremujorin e fundit financiar dhe, për ta thënë troç, rezultatet nuk ishin aspak pozitive. Kompania raportoi rënien më të madhe të të ardhurave në një tremujor gjatë më shumë se një dekade. Të ardhurat totale u regjistruan në 22.5 miliardë dollarë, një rënie prej 12% krahasuar me një vit më parë. Kjo është shqetësuese në çdo këndvështrim, por për Tesla-n, ajo paraqet edhe problemin më të madh që po përballet kompania dhe CEO i saj, Elon Musk: ndërsa Musk po shet një vizion për të ardhmen, realiteti i së tashmes lë për të dëshiruar.
Le të lëmë mënjanë faktin që dërgesat e automjeteve të kompanisë kanë rënë me 14% dhe marzhet e fitimit janë ulur në pak mbi 4%, një nivel i krahasueshëm me prodhuesit tradicionalë të makinave. Ajo që e dallonte Tesla-n që në fillim ishte fakti që nuk paraqitej si një kompani makinash, por si një kompani teknologjie. Ky pozicionim frymëzoi investitorët të derdhnin miliarda dhe i dha kompanisë një vlerë tregu që kapërceu 1 trilion dollarë, një shifër marramendëse për një kompani që prodhon automjete.
Mirëpo, e ardhmja e Tesla-s nuk ka qenë kurrë vetëm për makinat, të paktën jo ato që i drejton njeriu. Ajo është ndërtuar mbi premtimin për robotë dhe robotaksi vetëdrejtues. Kompania po rrëfen një histori për një të ardhme ku robotët do të kryejnë çdo punë, ndërsa ne do të udhëtojmë në makina autonome që, kur nuk na shërbejnë neve, mund të gjenerojnë të ardhura. Por në një pikë të caktuar, rrëfimi nuk mjafton më. Duhet të fillosh të realizosh atë që ke premtuar, dhe sot, shifrat tregojnë se publiku nuk po e blen më këtë histori. Gjatë një dekade, Tesla arriti të bënte të pamundurën: të ndërtonte një kompani harduerike që trajtohej në bursë si një startup teknologjik. Ajo kishte një narrativë bindëse, një CEO karizmatik dhe, për një kohë të gjatë, edhe shifra që e mbështesnin këtë besim. Model 3 dhe më pas Model Y u bënë ndër automjetet më të shitura në SHBA. Tesla realizoi mjaft objektiva për të bërë që edhe dështimet të perceptoheshin si pjesë e “magjisë”. Por ajo fazë duket se ka përfunduar.
Lexo edhe: Sipërmarrjet e gjelbra në Shqipëri, sfida dhe perspektiva për një ekonomi të qëndrueshme
Në përballje me këto sfida, Musk po bën atë që di më mirë: po tregon vizionin e radhës. Dhe ndoshta Tesla ka ende kapacitetin financiar dhe burimet njerëzore për ta realizuar. Por problemi më i madh është se gjithnjë e më shumë njerëz nuk e besojnë më këtë vizion, ose më keq akoma, nuk u intereson. Musk po përpiqet të riformulojë rrëfimin: Tesla nuk është një kompani makinash, por një kompani inteligjence artificiale. Por edhe kompanitë e AI-së duhet të tregojnë progres të prekshëm, përtej prezantimeve pompoze apo videove demonstrative. Këtu fillon edhe kriza e besueshmërisë. Dikur Tesla ushqehej nga një kapital kulturor dhe emocional. Njerëzit besonin në misionin e saj, në produktin e saj. Musk ishte gjeniu i çrregullt, por vizionar, që ndërtonte raketa në kohën e lirë. Ai ishte një shitës i shkëlqyer i ëndrrave, dhe kjo i dha Tesla-s një avantazh të madh.
Sot, ndërkohë që Musk përfshihet në debatet politike, nis parti të reja, konfliktohet me ish-presidentin Trump dhe ironizon kundërshtarët në platformën X, imazhi i dikurshëm po zbehet. Nuk ndihmon as fakti që një pjesë e madhe e rritjes së Tesla-s u nxit nga kreditë tatimore që tashmë po zhduken. Ndërkohë, konkurrenca po e arrin. Tregu i automjeteve elektrike nuk është më bosh dhe Tesla nuk është më “underdog”-u i guximshëm, por gjigandi që po përpiqet të shesë një të ardhme, ndërkohë që i ikën toka nën këmbë në të tashmen. Të ndërtosh mbi vizione madhështore funksionon vetëm nëse di të zbatosh. Dhe në vitet e fundit, Tesla ka treguar një sërë problemesh: vonesa në prodhim, probleme me softuerin, afate të humbura për robotaksit. Lista e premtimeve të papërmbushura po rritet.
Prandaj shifra e të ardhurave këtë tremujor është më shumë se një statistikë negative, është një sinjal zgjimi. Është një rikujtim se nuk mund të rritesh përjetësisht duke treguar histori. Nuk mund të ndërtosh një kompani trilion-dollarëshe vetëm mbi ide. Në një moment, duhet të japësh rezultate konkrete.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
