Edhe pse Shtetet e Bashkuara dhe Shqipëria janë tregje me përmasa krejt të ndryshme, të dyja po përjetojnë një interes gjithnjë në rritje për investime reciproke, në një nivel shumë më të lartë krahasuar me vetëm pak vite më parë.
Grupet më të mëdha të biznesit, si Balfin, tashmë kanë kaluar Atlantikun duke krijuar kompani ndërtimi në SHBA. Për herë të parë në historinë shqiptare, rajoni i Ballkanit përfaqësohet në listën e Forbes me miliarderin e tij të parë, z. Samir Mane, themelues dhe president i Balfin Group. Ky trend zgjerimi po ndiqet edhe nga grupe të tjera, kryesisht në sektorin e ndërtimit, tregtisë dhe ushqimit. Në të njëjtën kohë, investimet amerikane po bëhen pjesë e iniciativave strategjike të Shqipërisë, veçanërisht në sektorin e turizmit, si projekti zhvillimor i Ishullit të Sazanit. Kjo bashkëpunim ekonomik në rritje ka sjellë edhe një trend të ri: zgjerimin e investimeve në fushën e konsulencës.
Së fundmi, në New Jersey është krijuar iSmart Consulting, një kompani që ofron shërbime PR dhe zgjidhje digjitale, me synimin për të shërbyer si një zë më i fortë dhe një urë lidhëse mes bizneseve që duan të hyjnë në tregjet e njëri-tjetrit.
Kompania është themeluar nga sipërmarrësi amerikan Blerim Sefa dhe sipërmarrësja shqiptare Albana Muçaj. Në një intervistë për Businessmag, Muçaj theksoi se ka ardhur koha që ekspertiza shqiptare të eksplorojë tregjet ndërkombëtare.
Porfesioniste me përvojë të gjatë në komunikim, me sfond në gazetari dhe drejtësi, Muçaj sjell mbi 25 vite eksperiencë në komunikim dhe gati një dekadë në biznes. Ajo shfaqet e sigurt në planet për të punuar me biznese ambicioze që synojnë tregje të reja, sidomos ato që kanë nevojë për një qasje ndërkulturore në komunikim. Kjo besim vjen nga vitet e konsulencës për biznese dhe organizata evropiane që kanë hyrë në tregun shqiptar, si edhe për bizneset shqiptare që janë zgjeruar jashtë vendit.
“Përmes komunikimit ne veprojmë si një lehtësues, një urë që u mundëson bizneseve të arrijnë tregjet e tyre më shpejt dhe më qartë,” shprehet ajo. Në Shqipëri, Muçaj ka mbështetur gjithashtu startup-et e drejtuara nga vajza dhe gra, duke i udhëhequr në hapat e tyre të parë sipërmarrës.
Sipas saj, sektorët më premtues në tregun amerikan janë teknologjia, ndërtimi dhe pasuritë e paluajtshme. Nga ana tjetër, sipërmarrësit amerikanë tregojnë interes gjithnjë e më të madh për Ballkanin, veçanërisht në projekte turistike dhe në prodhimin e energjisë së rinovueshme.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
