Warren Buffett, në moshën 94-vjeçare, surprizoi investitorët më herët këtë muaj gjatë mbledhjes vjetore të aksionerëve të Berkshire Hathaway në Omaha, Nebraska, duke shpallur përfundimin e karrierës së tij gati 60-vjeçare si CEO. Pasardhësi i tij, Greg Abel, 62 vjeç, do të marrë drejtimin zyrtarisht më 1 janar 2026, ndërkohë që Buffett do të vazhdojë të mbajë postin e kryetarit të bordit të Berkshire.
Lajmi për dorëheqjen e tij si CEO u dha në pesë minutat e fundit të një sesioni pyetje-përgjigje që zgjati pesë orë. Tani, detaje të reja kanë dalë në dritë mbi arsyet që e çuan Buffett-in të dorëzojë stafetën – dhe ato lidhen pikërisht me moshën e tij.
“Si e di njeriu ditën kur fillon të plaket?”, tha Buffett për The Wall Street Journal në një intervistë të mërkurën. “Në fakt, nuk fillova të plakesha për ndonjë arsye të çuditshme deri kur mbusha rreth 90 vjeç. Por kur fillon të plakesh, ajo është një gjendje që nuk kthehet më pas.” Buffett tregoi se vitet e fundit, pas kalimit të të 90-ave, ai ka filluar të ndjejë pasojat e moshës. Ka pasur vështirësi në kujtimin e emrave dhe i është bërë më e vështirë të lexojë gazetat, të cilat, siç thotë ai, papritmas dukeshin me tekst të paqartë.
Lexo edhe: “Sa muaj jetë ka startup-i juaj?” Pyetja që i bllokon shumicën e themeluesve
Lindur në Omaha në vitin 1930, Buffett mori drejtimin e Berkshire Hathaway – asokohe një kompani tekstilesh – në vitin 1965, kur ishte vetëm 34 vjeç. U bë CEO dhe kryetar bordi në vitin 1970 dhe këtë gusht mbush 95 vjeç. Ai shtoi për WSJ se kurrë nuk kishte pasur synimin të ishte CEO i Berkshire për gjithë jetën dhe e quajti “befasuese” që qëndrimi i tij në këtë detyrë zgjati kaq shumë. Ai vuri re se dita e tij kishte filluar të bëhej më e ngadaltë, ndërkohë që Greg Abel sillte më shumë energji dhe arrinte të realizonte më shumë gjatë ditës së punës. “Dallimi në nivelin e energjisë dhe sa shumë ai [Abel] mund të arrinte në një ditë 10-orëshe krahasuar me mua ky ndryshim po bëhej gjithnjë e më i dukshëm,” tha Buffett.
Ai shtoi se Abel ishte “shumë më efektiv” në menaxhimin e operacioneve të përditshme të Berkshire dhe se “ishte e padrejtë, në të vërtetë” që ai të mos ishte vendosur më parë si CEO. Greg Abel iu bashkua Berkshire Hathaway në vitin 1999 pas blerjes së MidAmerican Energy Holdings – një kompani energjetike ku ai shërbente si drejtues. Në vitin 2018, Buffett e emëroi zëvendëskryetar të operacioneve jo të sigurimeve. Në mbledhjen e aksionerëve të vitit 2021, ai konfirmoi publikisht se Abel do të ishte pasardhësi i tij si CEO. Megjithatë, Buffett i tha WSJ se planifikon të vazhdojë të punojë në Berkshire dhe se shëndeti i tij aktualisht është i mirë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
