Inflacioni në Itali kapi normën më të lartë në më shumë se një dekadë pasi rritja e kostove të energjisë vazhdoi ë rriste çmimet. Kostoja e jetesës u rrit me 4.2% nga një vit më parë në dhjetor, krahasuar me një avancim prej 3.9% muajin e kaluar, tha të mërkurën në një deklaratë instituti italian i statistikave Istat.
Ndërsa Spanja e regjistroi gjithashtu inflacionin më të shpejtë në 30 vite në dhjetor, vendet e eurozonës që ndodhen më në veri mund të kenë përjetuar tashmë kulmin. Çmimet franceze u stabilizuan muajin e kaluar, sipas shifrave të publikuara në fillim të kësaj jave, ndërsa të dhënat gjermane të së enjtes pritet të tregojnë se inflacioni u lehtësua në prag të Krishtlindjes.
Pritjet për ngadalësimin e rritjes së çmimeve në bllokun e monedhës në tërësi i lejuan Bankës Qendrore Evropiane të hartonte një dalje nga stimuli monetar pandemik në dhjetor. Institucioni me bazë në Frankfurt planifikon t’i japë fund blerjeve neto në kuadrin e një programi emergjent të blerjes së bonove në mars, pavarësisht kërcënimit ekonomik nga varianti omicron i koronavirusit.
Në Itali, faktori kryesor që nxit rritjen e çmimeve mbeten kostot e energjisë me faturat e shërbimeve që u rritën 14.4% nga një vit më parë dhe kostot e transportit me 9.6%. Rritje me 3.6% ka patur edhe shërbimet që kanë të bëjnë me mikpritjen, si hotele dhe restorante. Kostot e ushqimeve dhe pijeve u rritën me 2.9%.
Qeveria, e udhëhequr nga kryeministri Mario Draghi, ka vepruar në mënyrë të përsëritur për të zbutur ndikimin e faturave të larta të energjisë elektrike dhe ngrohjes tek familjet dhe bizneset, duke lënë mënjanë 4 miliardë euro (4.5 miliardë dollarë) nga buxheti për këtë qëllim në pjesën e parë të 2022.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
