Sipas të dhënave, në këtë periudhë Indeksi i Çmimit të Banesave u rrit me 5.2%. Ndërtuesit shpjegojnë se është rritur kërkesa për apartamente për hipotekë, në kushtet kur janë lehtësuar edhe kreditë për blerje banesash. Një tjetër faktor që ka rritur çmimet janë edhe taksat vendore, që iu faturohen qytetarëve nga ndertuesit në çmimin e shitjes së apartamentit.
Shtrenjtohet tregu i banesave
Banka e Shqipërisë konstaton se në tremujorin e dytë të vitit indeksi i çmimit të banesave u rrit me 5.2%, pas rritjes me 11.3% një tremujor më parë. Një tendencë që vijon në rritje që prej mesit të vitit të kaluar, bazuar në të dhënat e Bankës Qendrore.
Ekspertët vlerësojnë se rritja e çmimeve është ndikuar nga shtimi i kërkesës për apartamente. Kjo në kushtet kur bankat kanë lehtësuar standardet e kreditimit për blerje banesash, si në drejtim të lehtësimit të procedurave, ashtu edhe uljes së interesave.
Ndërtuesit shpjegojnë se ekziston një stol prej 4 mijë apartamentesh të pashitura, por ato janë pa hipotekë dhe qytetarët nuk janë të interesuar për to. Kjo ka bërë që kërkesa për objekte të hipotekuara të rritet dhe rrjedhimisht, edhe çmimi i tyre. Për operatorët e tregut, një tjetër faktor që ka ndikuar në rritjen e çmimeve janë edhe taksat vendore për metër katror për objektet e ndërtuara, kosto që iu faturohet qytetarëve në çmimin e shitjes së objektit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto