Hotel Adriatik, një sipërmarrje e qëndrueshme mes sfidave të bregdetit durrsak - Business Magazine Albania

Hotel Adriatik, një sipërmarrje e qëndrueshme mes sfidave të bregdetit durrsak


Përshkrimi i rrugës së plazhit në Durrës është i trishtë. Pallatet në krah janë pothuajse bosh, ndonjë prej tyre pa krisje të dukshme mban rrobat e nderura në ballkon. Të tjera pallate kanë shiritin e sigurisë. Pranë disa prej tyre po rikonstruktohet, ndërsa nuk mungojnë dyqanet aktive edhe në katin e parë të ndonjë pallati dukshëm të dëmtuar e të pabanueshëm.

Ne jemi nisur për tek Hotel Adriatik, i cili na bëhet e ditur më parë që nuk është dëmtuar, por me këtë panoramë të zonës gati e vështirë të besohet. Në fakt mbërritja atje na e konfirmon sigurinë. Hoteli bie në sy për hapësirën e madhe në dispozicion jashtë, por edhe në brendësi. Pak i ngjashëm më ndërtimet e reja, ku çdo cep duhet shfrytëzuar.

Në fakt siç mësojmë më vonë nga Katerina, menaxherja e eventeve, hoteli ka 70 dhoma, ndonëse parë nga jashtë duket një hotel me mbi 100 dhoma.

Adriatik me një histori të hershme, si destinacion i udhëheqësve të qeverisë në kohën e komunizmit, ka përfunduar rikonstruktimin e parë në vitin 2003 kur hoteli i rihap me standardet europiane me 5 yje.

Ndërkohë rinovimi tërësor i fundit i hotelit u përfundua në 2018, ndërsa në shtator 2019 Spa luksoze, Qeen Teuta.

Salla e madhe e eventeve në katin e fundit, është sa e gjithë struktura, ndërsa hollet e bollshme në brendësi të hotelit të venë në mendime, nëse ky hotel është pasqyrë e një ndërtese të rëndësishme të periudhës para viteve ’90 apo ka marrë nga modeli amerikan i hapësirës dhe madhështisë, ndikuar nga Menaxherja e Përgjithshme e Hotelit Nevila Dudaj, e cila prej disa vitesh po e ndan jetën e saj mes Shqipërisë dhe Amerikës. Më saktë po i bashkon këto dy vende në jetën e saj. Nevila ka hapur atje një agjenci turistike, ku promovon fort Shqipërinë e rajonin e ballkanit, dhe sigurisht edhe hotelin e saj. Për të plotësuar ciklin e shërbimeve ajo publikon një revistë për tregun Amerikan “Travel to Albania”, ndërsa në hollin e hotelit është edhe zyra e guidës turistike.

Deri në prag të Krishtlindjeve, për një muaj rresht, përfaqësuesit e hotelit tregojnë se pritën mbi 20 familje, duke i akomoduar dhe ushqyer, ndërsa, si shumë sipërmarrje të tjera në Durrës, kanë mbështetur me ushqime, në rastin konkret në Kishën e shën Vlashit. Nevila Dudaj tregon se, “ishte e pamundur të veproje ndryshe. Vetë familjet e punonjësve tanë, mbetën pa shtëpi”. Sipas saj, shqetësimi fillestar ishte se qytetarët nuk futeshin brenda për shkak të shokut që kishin pësuar nga lëkundja. Ky është momenti kur ajo i gëzohet faktit që gjatë rikonstruksionit, ruajti me rigorozitet strukturën e godinës dhe investoi pa kursim në sigurinë e tij.

Prej një viti, hoteli ka brenda edhe një thesar të çmuar Spa e Thalassopool, me emrin e mbretëreshës së Durrësit Teuta. Qetësia dhe mikpritja nga stafi kombinohen aq mirë sa sigurojnë maksimumin e komoditetit dhe shërbimit njëkohësisht. Bregdeti i afërt, ku mjafton të kalosh tunelin e harkuar të gjelbër, pikërisht si në dasmat në Havana, të bën të mendosh që edhe këtu mund të organzosh një ceremoni kurorëzimi, pa asnjë mangësi nga brigjet tropikale.
Afërsia me detin, shërbimi i ngrohtë dhe struktura e hotelit janë elementë të vlerësuar edhe nga personazhi botëror tashmë në fushën e turizmit Anthony Melchiorri. “Big surprise for me Albania”, e cilëson ai përvojën e tij në Shqipëri.

Por, hoteli i ndërtuar në vitin 1957 dhe destinacion vetëm për diplomatët e krerët e shteteve, nuk është më vetëm vetëm destinacion i shqiptarëve dhe të hujave nga e gjithë bota. Shtetas të huaj gjejmë mes stafit dhe i tillë është menaxheri i ushqimeve dhe pijeve. Me shumë kujdes ai sigurohet që darka ishte e shijshme.

Po të njëjtën vëmendje shfaq edhe të nesërmen paradite gjatë eventit të fëmijëve me kuzhinierin e restorantit “Bëj picën tënde”. Drejtuesit e Hotel Adriatik tregojnë se krahas shumë eventeve që zhvillojnë si zumba, joga, meditim, çdo fundjavë organizohen edhe “cooking classes”, ku fëmijët mësojnë të gatuajnë bashkë me kuzhinierin e hotelit. Ky është një opsion edhe për të kaluar pak kohë në fundjavë.

Në fakt, pak para se të niseshim, ne bëmë edhe një shëtitje buzë detit, përkrah pallateve afër bregut. Është pothuajse e njëjta panoramë deri në mbërritje. Pallate bosh, hotele dhe struktura të dala në shitje… edhe pse të dëmtuara. Pak më larg, në një prej pallateve, edhe pse me krisje nga tërmeti, duket se ka banorë. Në fakt dy vëllezër në klasën e parë dhe të tretë, thonë se po banojnë aty, pasi janë larguar nga shtëpia e tyre e dëmtuar më në afërsi të qytetit. Ata po kujdeseshin për dy këlyshë të vegjël, ndërsa pak më tej, makina e policisë dhe një punonjës policie, ruante pallatet bosh, nga ndonjë grabitje e mundshme.

https://www.facebook.com/hoteladriatikdurres/videos/221529592194315/?t=7

Must watch
Business Mag Nr. #25 - Mars 2021

Kjo periudhë përkon me një vit të plotë në kushte pandemie në vendin tonë, në Europë dhe në mbarë botën. Në një vit ndodhën shumë zhvillime, të paparashkuara ndonjëherë më parë nga ne, duke hedhur poshtë shumë plane apo projekte tonat për rritjen. Por, në këtë kohë sipërmarrje të ndryshme u vunë në lëvizje për të gjetur zgjidhje të reja e për të siguruar mbijetesën.

Në këtë numër të revistës, vijnë zhvillimet përmes gjurmëve që kanë lënë tek industri, sipërmarrje apo individë sipërmarrës.

Pano Soko, ekonomist i njohur flet për efektet e paketave ekonomike të mbështetjes dhe nevojën për paketa ndihme në industritë e prekura.

Rubrika 3X3 i kushtohet industrisë së verërave. Nga intervistat tona me 3 prodhues rezulton se

verërat shqiptare janë të “paralizuara” nga pandemia.

Verërat janë në një trend me turizmin. Brunila Liçaj, profesore dhe eksperte në fushën e turizmit është optimiste për të ardhmen e kësaj fushe.

Në rubrikën e brandeve kemi sjellë, fabrikën e qumështit dhe prodhimeve të bulmetit “Lufra”, ndërsa një brand që po rimëkëmbet nga Kosova është prodhuesi i këpucëve artizanale “Perolli”. Të dy këto brande janë model frymëzimi për njerëzit e punës!

Një pjesë e rëndësishme e revistës i dedikohet konkursit dhe fituesve të Businessmag në …

Shiko më shumë
Na ndiqni në rrjetet sociale
0