Elvin Meka, ish-drejtor i Bursës së Tiranës dhe ekspert i tregjeve financiare, thotë se funksionimi i bursës do ta ndryshojë rrënjësisht tregun financiar në Shqipëri.
Tregu i kapitalit do të sjellë një kolonë të dytë zhvillimi, si alternativë në tregun tashmë të konsoliduar bankar.
“Natyrisht që ky përbën një lajm të mirë, të mirëpritur të themi në sistemin financiar shqiptar. Duhet të ishte bërë me kohë ose më mirë duhet të themi nuk duhet të ishte lejuar mbyllja e bursës së Tiranës, pavarësisht sot flasim për një subjekt që nuk ka të bëjë fare me shtetin, por vjen nga një sipërmarrje tërësisht private. Ky është një lajm akoma më i mirë. Mendoj se sfida e këtij subjekti të ri privat mbetet e njëjtë si në ’96 edhe në vitin 2000, që ka të bëjë pikërisht me atë që, cila do të jetë lënda e parë ose produktet që do të ofrohen, që do të tregtohen nëpërmjet këtij subjekti të ri”, deklaroi Meka.
Sfida kryesore për bursën e re, sipas Mekës, do të jetë te sigurimi i produkteve të mjaftueshme për t’u tregtuar në të. Ai është i mendimit se, në afatin e shkurtër, potencialet e zhvillimit janë sidomos te instrumentet e borxhit koorporativ dhe sidomos te obligacionet. Fakti është disa kompani shqiptare kanë nisur emetimin e titujve të borxhit përbën një sinjal të interesit për këtë formë të huamarrjes.
Obligacionet mund të ofrojnë një sërë avantazhesh, si për emetuesit, ashtu edhe për blerësit. Përmes obligacioneve, bizneset mund të sigurojnë hua afatgjatë me kushte më të favorshme. Ndërkohë, investitorët mund të përfitojnë kthime më të mira krahasuar me investimet financiare tradicionale. Gjithashtu, ekzistenca e një burse e bën obligacionin një instrument likuid dhe të tregtueshëm në çdo kohë.
“Ajo që është e mundshme për t’u zhvilluar, nisur nga konteksti historik i zhvillimit të produkteve dhe tregjeve. Në radhë të parë unë do të veçoja obligacionet të korporatave, si një produkt shumë i ngjashëm me huanë bankare, pra ku bizneset e mëdha janë të familjarizuara me mënyrën e funksionimit të produktit”, tha Meka.
Sipas Mekës, mungesa e vullnetit politik për ta bërë funksionale ish-Bursën e Tiranës i shkaktoi tregut një humbje të madhe në kohë. Përvoja që mund të ishte fituar nga Bursa e Tiranës, do të kishte hedhur tashmë disa baza në njohjen e instrumenteve të tregut të kapitalit nga shqiptarët.
Në fillim të kësaj jave, Autoriteti i Mbikëqyrjes Financiare licencoi Bursën Shqiptare të Titujve – ALSE, të parin treg privat të kapitalit në Shqipëri. Në vitin e parë të aktivitetit, pritet që operacionet të fokusohen kryesisht te tregtimi i letrave me vlerë të qeverisë shqiptare, ndërsa më tej pritet që t’i hapet rruga edhe tregtimit të titujve të biznesit.
/Scan-Tv
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English