Gjykata më e lartë e Bashkimit Europian vendosi të Enjten se kompanitë private mund të ndalojnë stafin të mbajnë shami në emër të ruajtjes së neutralitetit fetar.
“Dëshira e një punëdhënësi për të shfaqur, në marrëdhëniet me klientët, një politikë të neutralitetit politik, filozofik ose fetar mund të konsiderohet si një qëllim i ligjshëm,” shkroi në një deklaratë Gjykata e Drejtësisë e Bashkimit Europian me seli në Luksemburg.
Çështja shkoi në gjykatë nga dy gra myslimane gjermane, të cilave iu tha që të hiqnin shamitë, ose hixhabet, nga menaxherët e tyre në punë. Në të dy rastet, ato filluan të mbanin shami në punë pasi u kthyen nga leja e tyre e shtatëzanisë, raportoi The Guardian.
Sipas gjykatës, njëra prej tyre, e cila punonte si kujdestare për nevojat e veçanta, u pezullua dy herë dhe iu dha një paralajmërim me shkrim. Qendra gjithashtu kishte ndaluar më parë mbajtjen e të gjitha simboleve fetare, përfshirë edhe kryqin.
Tjetra, e cila punonte si asistente dhe arkëtare në një farmaci, iu tha nga punëdhënësi i saj se ajo nuk ishte e lejuar të vishte asgjë që shfaqte shenja të dukshme politike, filozofike ose fetare.
Të dyja çështjet shkuan së pari në gjykatat lokale gjermane përpara se të kalonin në Gjykatën e Drejtësisë të Bashkimit Europian.
Kjo nuk është hera e parë që gjykata e BE vendos në favor të punëdhënësve në lidhje me heqjen e rrobave që shfaqin ose nënkuptojnë simbole fetare ose politike.
Në vitin 2017, e njëjta gjykatë vendosi gjithashtu që kërkimi i punonjësve për të hequr mbulesat fetare nuk ishte diskriminim për sa kohë që ishte pjesë e një politike të përgjithshme që ndalonte të gjitha simbolet fetare dhe politike.
Mbulesat fetare janë një çështje e diskutueshme në Europë, me grupe myslimane që argumentojnë se kjo është e detyrueshme në fenë e tyre dhe duhet të respektohet. Austria, Franca dhe Belgjika kanë ndaluar që të mbulohet e gjithë fytyra, por hixhabet lejohen.
Këshilli i Myslimanëve Europianë nuk u është përgjigjur ende kërkesave për koment.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
