Këshilli Kombëtar i Territorit në mbledhjen e së martës që u zhvillua në Tiranë, prezantoi dhe miratoi Planin e Përgjithshëm Kombëtar dhe dy plane ndërsektoriale, Planin e Bregdetit dhe Planin për zonën ekonomike Tiranë – Durrës.
Ministrja e Zhvillimit Urban Eglantina Gjermeni, duke marrë fjalën në këtë takim u shpreh se, miratimi i tre planeve vjen në përfundim të proçesit të konsultimeve me secilën ministri, pjesë e Komitetit Ndërministror për Hartimin e Planit të Përgjithshëm Kombëtar. “Eshtë bërë një punë e madhe gjatë këtyre 2 viteve, vijoi ajo, duke nënvizuar faktin se, miratimi i planeve kombëtare i hapin rrugë investimeve të huaja dhe i japin fund informalitetit.
“Ky proces mund të konsiderohet historik. Planet kombëtare parashtrojnë në vetëvete dokumentat e planifikimit strategjik për të ardhmen dhe zhvillimin e vendit”, tha Gjermeni. Ato vendosin rregulla për investimet dhe garantojnë siguri për investimet e huaja, u shpreh ajo.
“Them se planet kombëtare do të paraprijnë zhvillimin ekonomik dhe social të vendit për 15 vitet e ardhshme, për një vend konkurrues, një destinacion turistik dhe ekonomik, që aspiron Shqipëria”, deklaroi Gjermeni.
Ndërsa zëvendës kryeministri Niko Peleshi, tha se miratimi i planeve kombëtare është me rëndësi në vizionin e qeverisë për të parashtruar projekte dhe fonde në dobi të zhvillimit të vendit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
