Genti Beqiri, Drejtori Ekzekutiv i AIDA jep dorëheqjen

Tiranë më 16 Maj 2017,

Sot me anë të një deklarate të postuar disa orë më parë në faqen zyrtare në Facebook të AIDA, Z. Beqiri ka pohuar largimin e tij nga ky pozicion, duke falenderuar njëkohësisht të gjithë ata që i besuan këtë përgjegjësi të madhe.

Ai ka njoftuar se nuk do të jetë më në drejtimin e Agjencisë për arsye personale. Megjithatë ai beson se AIDA do të vazhdojë me të njëjtin ritëm për të ofruar një shërbim sa më të mirë.

Agjencia Shqiptare e Zhvillimit të Investimeve (AIDA) operon në tregun shqiptar që në vitin 2010 duke ofruar për investitorët e huaj dhe vendas, mbështetje gjithëpërfshirëse për projektet e tyre të investimeve.

Deklarata e plotë e Drejtorit Ekzekutiv të AIDA-s, Z. Genti Beqiri

Në qershor 2015, kur u emërova në detyrën e Drejtorit Ekzekutiv të Agjencisë Shqiptare për Zhvillimin e Investimeve – AIDA, isha i vetëdijshëm për përgjegjësinë e madhe që më ishte besuar, në një nga sektorët më prioritarë në vend siç janë investimet. I jam mirënjohës Kryeministrit Z. Edi Rama për besimin e dhënë në drejtimin e këtij institucioni. Kjo më ka nxitur për të punuar çdo ditë, pa pushim, për zhvillimin e mëtejshëm të AIDA-s, si një strukturë gjithnjë e më shumë dinamike, në ndihmë të investitorëve të huaj, por edhe atyre vendas.

Në këto 2 vite në detyrë, AIDA është rritur profesionalisht, e bashkë me të, janë rritur të gjithë treguesit e objektivave të punës së saj, që nga niveli i investimeve, klima e biznesit, numri i bizneseve të reja në vend, si edhe shumë tregues të tjerë. Por, AIDA në rrugën e saj nuk mund të kishte kurrsesi sukses e vetme. Ka qënë partneriteti me agjencitë homologe, me organizatat e biznesit dhe me miqtë e partnerët e tjerë, të huaj e vendas, që na solli në një stad të ri zhvillimi profesional. Shumë punë të mira janë bërë, por sigurisht që të tjera mbeten për t’u bërë për rritjen e kapaciteteve profesionale, për të adresuar dhe asistuar në kohë reale si një “One Stop Shop” kërkesat dhe nevojat e investitorëve dhe biznesit.

Për gjithçka kemi bërë në këto dy vite, unë dua të falenderoj posaçërisht stafin e palodhur të Agjencisë, bashkëpunëtorët e mi më të afërt, partnerët e tjerë, organizatat e biznesit dhe këdo tjetër me të cilin kemi bashkëpunuar në këtë periudhë për ta bërë AIDA-n më të mirë dhe Shqipërinë më tërheqëse për investitorët. Sot, për arsye tërësisht personale, më duhet t’ju njoftoj se unë nuk do të jem më në drejtimin e Agjencisë, por sigurisht mbetem i përkushtuar për t’i shërbyer vendit tim në poste dhe sfida të reja në të ardhmen.

Ju Faleminderit!